Kaupapa: Politics

Me piki ake te rahi o ngā utunga penihana ki tā Te Pāti Māori karanga

E ai ki Te Pāti Māori me piki ake te rahi o ngā utunga penihana, mātua rā ki te hunga whakaraerae pēnei i ngā mātua whai tamariki.

Hei tā te kaiārahi takirua, a Marama Fox, he paku rawa te pikinga o ngā utunga penihana i ngā tau, ā, ka mahi tahi rātou ko te Kāwanatanga ki te whakatika.

I te urunga mai o Marama Fox ki te Whare Pāremata i whakatauria ko ia te kaiwero mō ngā kaupapa kaore e tau pai ana ki te Pāti Maori, ā, kua kitea tērā i ngā tau kua taha.  Ko tana kaupapa i tēnei wā ko ngā penihana, hei tāna he paku rawa, ā, me piki ake.

Ko ngā tamariki noho pōhara te māharahara nui mō Fox, hei tāna me noho ko rātou te aro mō ngā taumata utunga penihana.

Hei tā Fox, “Ki a mātou, he iti rawa te penihana i tēnei wā me whakatikahia tēnā. Ko ngā tangata kei runga i te penihana ka noho rawa kore, engari ko o rātou tamariki ngā mea ka haere mate kai ki te kura, ka haere kore hū ki te kura.”

E ai ki a Marama Fox e ngoki ana te Kāwanatanga ki te whakapiki i ngā utunga penihana.  E ai ki ngā tatau rua mano mā iwa ki te rua mano tekau mā whā, mo ētahi mātua tokorua kua piki te penihana mā te toru tekau mā tahi tāra ia wiki.

Mō tētahi mātua takitahi, he pikinga rua tekau mā ono tāra.

Heoi ki te titiro ki ngā utunga penihana kaumātua, mō tētahi tangata takitahi, kua piki ake mā te rima tekau mā ono tāra ia wiki.

E ai ki a Fox, “Āe, kei te pai tēnā, me rapu mahi.  Engari te wā kaore i te rapu mahi, e hika, kāore mātou i te hiahia kia noho mate kai te tangata, me o rātou tamariki.  Koira te mea nui ki au, ko te whānau.”

E ai ki te kaikōmihana mō ngā tamariki, me kōkiri arotake.

Kāti, e ai ki te Pāti Māori, ka wero hoki rātou i te Kāwanatanga mō tēnei kaupapa.

E ai ki te Pirimia ko te pōharatanga tētahi o ngā kaupapa nui a te Kāwanatanga, nōreira tāria te kitenga o ngā hua ka puta pea hei te Tahua Pūtea.