Ngā kaupapa: Education, Politics

Ka whakarēra e Flavell te ao tōrangapū hei taiurungi hōu mō TWOA

Ko ōna wheakoranga tōrangapū kei te hiahia kawea e Te Ururoa Flavell ki tana mahi hōu hei tumu whakarae o Te Wānanga o Aotearoa.

Hei te marama e tū mai nei, ka riro ma te tūmuaki takirua ō-mua o Te Pāti Māori nei te tuarua o ngā kura tuatoru nunui rawa o te motu e amorangi.

Ko tā Te Ururoa Flavell, anō nei he hokinga ki tōna ūkaipō tana eke ki tēnei tūranga hōu.

“I mua tonu i taku urunga ki roto i te whare pāremata koinā taku kai ko te āhuatanga ki te ao mātauranga,” i kī atu ia.

“Kei roto i te Whare Wānanga o Te Awanuiārangi, kei te Kura o Tīpene, ki ngā kura kei te motu.”

Tekau ma rua tau ia e mahi tōrangpu ana, a rere ana ko te roimata i te mutunga.

Engari, hei tāna, ka nui te whakatā, kua rite ia ki te whakamahi anō i ngāna mohioranga tōrangapu.

“Ngā piki ngā heke o te ao e pērā anō te āhuatanga ki ngā tāngata katoa. Ko tāku e kī atu, koirā tērā wāhi ki ahau, whare pāremata, he rawe, taku noho ki reira, me te tūtaki i ētahi.”

“Engari, anei te huarahi hōu, te waka hōu, te kaha hiahia te whakapiri atu ki Te Wānanga o Aotearoa, ka mutu ki ngā kaihoe o te waka, ko te hunga e kaha whakapau nei i wā rātou kaha mō te pāinga o te iwi Māori i roto i ngā take mātauranga.”

I whakatūria Te Wānanga o Aotearoa e Rongo Wetere rāua ko Boy Mangu e toru tekau mā toru tau ki muri. Ināianei ko rātou te kura wānanga kaitā tuarua i te motu me ngāna tauira e toru tekau ma rua mano.

E ngana ana a Flavell ki te pīkau i ngā mahi nā Rongo Wetere, Bentham Ohia rātou ko Jim Mather i kōkiri.

“Ko te mahi nui, ko te whakatika i ngā hapa, mēnā he hapa kei reira. Ko te whakapakari ake i ngā wāhi e tika ana.”

“Ka mutu ko te āta tirotiro haere i ētahi huarahi hei para i tētahi huarahi hōu, i te mea ko tēnei āhuatanga o te ao mātauranga kei te rerekē haere ia tau ia tau, ia kāwanatanga, ia kāwanatanga.”

Ka mutu, e koa ana ia ki te whakarērea ngāna here tōrangapū.

“Mā te tira hōu tonu te kaupapa e kawe. Kua huri a Tariana ki kaupapa kē, kua huri a Pita ki kaupapa kē, ā kua eke ki te wā kia huri a Te Ururoa ki kaupapa kē.”

Ka pōwhiri atu a Flavell ki tana tūranga hou, ā te rua tekau, ā tērā marama.