Ngā kaupapa: Prison, Te Reo Māori

He kōrero tōrangapū e pā ana ki a Serco me tētahi kauhau mō Te Reo

Heta Gardiner

Ki te kore a Serco e whakatika i tōna whare, me tūmatohi. Koinei tā te Minita Ara Poutama, tā Peseta Sam Lotu-Iiga whai muri i tāna hui tahi me ngā ūpoko whakahaere o taua kamupene i tēnei ata. 

E ai ki te Minita, i mārama tāna whakaputa i ōna āwangawanga ki a Serco me te Ara Poutama me tāna hoki e hiahia ana mō ngā whakahaere ki te whare herehere o Mautini.

Ko te mahi tūkino mauhere i taua whare herehere e whakapaetia ana e te āpitihana, whai muri i te putanga o ētahi whitiāhua ki te ipurangi mō ētahi huinga whawhai i waenga i ngā mauhere.    

I kaha patua te minita e te hunga pāpāhō, pērā nei he raiona e whakarite ana i tana mīti, ēngari ahakoa tērā, ahakoa, ana whakahau, kei te whererei ana ponga ihu kia Serco, ko te whakaputanga matua nō te rā nei, kaore ia mō te whiu i te wepu mārō, ki runga ia rātau, i tēnei wā.

He kaupapa anō i toko ake ki roto i te whare pāremata, ko te karanga kia whai wāhi ia te ākonga ki roto o aotearoa, ki te ako i te reo Māori ki rō kura. i ngā rā tata nei kua muramura mai te rama, ki te whakahuatanga o ngā kupu Māori, e tētahi ākonga Pākehā, nō te kāreti o Kapiti. Nōreira he aha tā te minita, a Hekia Parata, ki tēnei wero ōna?

He kaupapa mirimiri i te ngākau o te minita.

Hei tāna, “E whakae ana au me tika te whakahua i ngā kupu Māori.”

Ēngari, ki te taha whakaea. auere ake!

E ai ki a Parata, “Mō tētahi ture, mō ngā kura katoa, kaore au i te whakae ki tērā.”

Ko te wero, kua tere whakamoea e te minita, ko tēnei.

Kua māhoratia whānuitia te tēpā YouTube aa Finnian Galbraith, e akiaki ana i te tini ngerongero kia whakahuatika i te reo Māori. I tae tawhiti te toro o tana karanga, tae noa ki te BBC.

Ko te whare pāremata tētahi kainga matua, mō whakahua kuare.

Ēngari e ai ki te minita, me aro kē ngā matā, ki hunga kē.

Ki tā Hekia Parata, “Ko te nuinga ko ō hoa kei runga i te pouaka whakaata, kei runga i te reo irirangi. Ko taku ingoa ko Hekia Parata. Kaore ko te Paraata, kaore ko te Parataa, ko Parata.”

He pakanga me whakamau pea kia tīna, e tētahi atu, taiohi Pākeha.