Neke atu i te whitu rau ngā kaiporotēhi i takahi i te mata o Mauna Kea i Hawai'i

Taroi Black

E haere tonu ana ngā mahi whakatū whare karu whakatata, e toru tekau mita te teitei ki runga i te tihi o Mauna Kea i roto mai o Hawai'i.

Nā konā te whitu rau neke atu o ngā kaiporotēhi i takahi i te mata o Mauna Kea i te rā nei ki te aukati i ngā mahi, ā, he tekau mā tahi o rātou i mauherea.. 

Tangi mai ana ngā reo i runga i te riri me te āwangawanga. 

Whētukituki ana te manawa i te wā e tōtōtia hāeretia ana tēnei kaiporotēhi e ngā pirihimana.

I tēnei pō neke atu i te whitu rau ngā kaiporotēhi ka tū tonu ki te pupuri i te mana o tō rātou maunga tapu. Engari i te tōnga o te rā ka mauheretia te tekau mā tahi tāngata.

Kei te rite a TMT kia tīmata anō ai ngā mahi whakatū i tēnei karu whakatata whai muri i tā rātou whakataha i te kaupapa whakatū karu whakatata neke atu i te rua marama e hiki ana. He kotahi ira whā piriona tāra te utu.

Tika tonu, ka whakaroatia te whakatūtanga o te whare toru tekau mita te teitei nā te aukatinga a te hunga porotēhi i tēnei huarahi. Ka tahuri te kei o TMT me ngā pirihimana, kahore ana he mauheretanga, he pananga rānei.

Ka haere tonu te karanga a ngā uri Hawai'i, ā, pō noa, otirā, kotahi anake tō rātou hiahia - he aloha.