Kei te kaha whakahē tonu ngā iwi i te ara paipa ki Dakota

Talisa Kupenga

Kei te kaha tonu te tū totohe a te hunga whakahē i te ara paipa ki Dakota me tā rātou aukati i te ahunga atu o ngā mahi, e toru ira waru piriona tāra te wāriu, a Energy Transfer Partners.

Mō te hemo tonu atu te noho whenua a te hapori o te hopuni o Ngā Kōhatu Tapu, pātata atu ki Standing Rock Reservation. He kura kua oti kē i ā rātou te whakatū mā ngā tamariki e noho ana ki reira.

Ko te tini o ngā rangatahi ki te Pā o Sacred Stones ki North Dakota e kaha whakahē ana ki te whakatū paipa hinu ki reira.

E kore rawa rātou e noho kuare ana ki to rātou tū hei kaitiaki kaiporotēhe.

I whakatū he kura ki te pā mo nga tauira i raro i te tekau ma waru tau te pakeke; ko te Kura Kaitiaki Wai. Tēra anō ngā kaiako mā ngā tauira e rua rau te nui.

Kei te ako hoki rātou i te hītori taketake, ki te ahurea Māori hoki. Kei reira a Kingi Snelger e hāpai i te kaupapa.

E ai ki a Kingi Snelger (Ngāpuhi, Ngāti Whakaue, Whakatōhea, Ngai Tahu), "Tenei au, te tamaiti, te tamaiti nei nō Ngāpuhi e mihi atu nei ki a koutou katoa. Kua tae mai nei au i runga i te karanga o te rā hei tautoko i ngā tangata."

E tautokohia ana e Te Rūnanga Whakakotahi i Te Ao ngā nawe, ā, hei tēra Paraire ka mōhio he aha te whakatau kōti mō te noho a nga kaiporotēhe ki reira.