He rotarota hai whakaohooho i te rangatahi

Te Kuru o te Marama Dewes

Kua eke panuku te rōpū rotarota o Waiōrea i te whakataetae pao KUPU o Frontline.

Ko te whai a te rōpū nei he whakamahi i ngā rotarota ha=ei whakaohooho i te rangatahi ki ngā take o te wā.

Hei tā Te Rina Wichman-Evans (NgāPuhi, Ngāti Whātua), “Kia rongo ngā rangatahi Māori i ō mātau kōrero nā te mea kāre te nuinga o ngā rangatahi e mōhio ana ki ēnei raru nā roto i a Aotearoa.”

Hei tā ngā wāhine nei, he huarahi tēnei e tarea ai e rātau te whakakōrero i ngā take kāre e whītikina e te rā.

Ko tā Arihia Hall (Tūwharetoa, Ngāti Tūkorehe), “Ko te tuarua pā ana ki ngā rangatahi Māori me ngā taumaha me ō mātau ake taumahatanga, ko te tuatoru e pā ana ki ngā pēpi, te patu tamariki, me te aupēhitanga o ngā wāhine hoki.”

I tā rātau eke i te whakataetae KUPU ki Aotearoa, kua whai wāhi atu rātau ki te pakanga ki ngā toa rotatora o te whakataetae Frontline i tū ki Poipiripi, ki Ahitereria.

Ko tā Matariki Bennett (Te Arawa), “Tēnā pea e whakamana ō mātau kōrero i ērā tāngata kia kōrero mō o rātau hara me o rātau raru ki roto i tā rātau ake ao hei tangata whenua ki whenua kē.”

Kua piri tahi ngā wāhine Māori nei i roto i ēnei mahi, kua tūhono i roto i ngā wheako. Ka mutu ko tētahi o ngā rotarota, he kupu whakamahara ki ō rātau kaumātua.

Hei tā Manaia Tuwhare-Hoani (NgāPuhi, Ngāti Wai), “I te kōrero au ki tōku koroua ināpō, i te kī mai ia ko ngā whakaaro o tōku kaumātua a Hone (Tuwhare) he tino whakahīhī.”

Ināianei kei te kohi moni kia tarea ai te whiti atu ki te whakataetae ki Ahitereria a te Tīhema.