E haere tonu ana ngā mahi whakatū marae ki Hawai'i

Raniera Harrison

E kōkirihia ana te whakaaro kia whakatūria he marae i Hawai'i mā te iwi e karangatia nei, ko te iwi tuaono o Te Tai Tokerau. Ka whai tēnei i te whakaeketanga o ētahi mana o te waka o Hōkūlea ki Waitangi, ki te āta wherawhera i ngā tūhonotanga i whiti noa mai i Te Moana Nui a Kiwa.

Nō te whā whā whā nōtā kē ēnei taera o te pūoro. Pōhēhē kau ana e rima nahe anō ngā iwi o Te Tai Tokerau, e, meanei kē te tuaono

Whakaeke ana ngā tapu nui o Hawai'i ki Te Tii Marae i Waitangi. Kua toru tekau mā toru tau iāianei nā nō te wharaunga mai o Hōkūle'a i raro i ngā tikanga whakatere waka o tua whakarere. Ā, he iwi hōu anō, me pēhea e kore ai e whakatū i tētahi marae?

Hei tā Hekenukumai Busby, Tohunga Whakatere Moana, "Kōrero mai ngā Hawaiians kei hea tā rātou whenua mō te marae. Ka waea atu au ki a Sir James, ka mea mai a Sir James ki a au, he nui te whenua kei taua wāhi rā."

Nō te tau waru tekau mā rima, whakawāhia ai e Tā Himi Henare tonu ko te iwi kaumoana o Hōkūle'a te iwi tuaono o Te Tai Tokerau. Koia i huaina ai ko Ngāti Ruawāhia e hoki pēnei tonu mai nei i te ōhākī o Tā Himi tonu.

Ā, me te aroha tonu atu ki te hunga i terea mai he toru tekau mā toru tau pūanō ki muri.

Hei tā Busby anō, "Ko matemate katoa rātou. Ka mutu, ko ahau nahe anō te mea e toe ana. Ka aroha ake au ki a au anō."

Hei tā tēnei kaumoana taketake o Hawai'i, kia kaua e tuku mā te tawhiti i ngā ngāru moana ngā iwi e wehewehe, engari kē ia, māna rā ia ngā iwi nei e whakakotahi.

Horekau kē anō kia āta wānangahia ko āhea hoki pēnei mai anō ai a Ngāti Ruawāhia, otirā, ngā mana o te waka o Hōkūle'a.