Kaupapa: Te Reo Māori

He mahi hurahrua raraunga kia inehia te whanaketanga o Te Reo

Te Kuru o te Marama Dewes

He whitu mano ngā tamariki kei te tātaritia ki te rangahau whāroa "E Tipu Ake Ana Ki Aotearoa", arā, mai i te kōpu ki te reanga rangatahi. Ko Te Whare Wānanga o Awanuiārangi kei mua i te taha Ahurea me te Tuakiri, arā hei tā Ahorangi Taiarahia Black he rauemi ka puta hei hāpai i ngā kaupapa-here whakarauora i Te Reo Māori.

Hei tā Ahorangi Taiarahia Black (Ngāi Tūhoe, Te Whānau a Āpanui, Ngāti Tūwharetoa), “Ka mōhio tātau kei whea ngā tamariki nei i roto i to rātau ao Māori ao Pākehā, ka mohio tatau he aha nga huarahi kei mua i a rātau e hikoi ana rātau, ka mōhio tātau ko wāhea o ngā momo mātauranga ka whai whakaaro ratau hei whakatipu i a ratau i roto i to rātau ao.”

Ko Te Whare Wānanga o Awanuiārangi tērā e tewhatewha ana i ngā raraunga o te rangahau whāroa e kīia nei, ko Tipu Ake Ana Ki Aotearoa.

“Ka mohio tātau ka pehea ra to ratau whakahoahoa tetahi tamaiti ki tetahi tamaiti, a pakeke noa taua tamaiti nei kia rangatahi, ka mōhio tātau he aha ngā rauemi hei whakahoahoa kaha i a rātau,” te kī a Ahorangi Taiarahia Black.

I kuhu te whānau a Shaun Cooney (Ngāti Ranginui) ki te rangahau i te wā e whanake tonu ana te tamāhine ki te kōpū a te kōkā. Kua iwa tau te tamāhine ināianei, hei tā Cooney he hua ki tōna whānau. Kātahi anō ia ka uru ki tētāhi akomanga reo Māori ki Te Whare Wānanga o Awanuiārangi.

“Unfortunately some of us haven't had that in our lives but very lucky enough to give it to our tamarikis to start on,” te kī a Cooney.

Kei te takiwā o te rua tekau mā whā ōrau o ngā kaiwhakautu he Māori. Hei tā Ahorangi Taiarahia Black ehara mā te Māori anake tēnei mahi ketuketu kōrero.

“Kia whakaatutia ki te ao te whānui, te noho tahi o te reo ki roto i te tamaiti Māori me te tamaiti Pākehā ahakoa kei hea e haere ana,” te kī a Black.

Ko te whakapae ia ka whakaritea te whakaputanga nei hei te puku o te tau e taka mai ana.