Water Sports dominate Māori Sports Awards

James Perry, Ruth Smith

I kohi te kaihoe waka reti, a Lisa Carrington (Te Aitanga a Mahaki, Ngāti Porou) i te tohu Rongomaraeroa mō te wā tuarima. He whakakōpanetanga mō ngā hākinakina ā wai.

E whā ngā mētara i riro i a Carrington i te whakataetae a Ao Waka Reti i tū ki Pōtiukara. Kāore a Carrington i whai wāhi ki te kohi i te taonga ā tinana, heoi nā tāna kaiako, nā Gordon Walker te kōrero ko Carrington te tangata anake, tāne mai, wāhine mai ki te wikitōria i ngā whakataetae a Ao K1 mō ngā e wā e waru karapīpiti.

Hui katoa, tokorima ngā tohu i whakawhiwhia ki ngā kaipara, kaiako rānei o ngā hākinakina ā wai, ka mutu e rima ngā kaipara i whakamānawatia mō ā rātou angitu i ngā whakataetae a Ao.

Mō te wā tuarua, kua whakawhiwhia e te kaiako o Horouta Waka Ama, e Kiwi Campbell (Ngāti Porou, Tūhoe, Te Whānau a Apanui) te tohu Te Maru o Tūmatauenga, mō te kaiako toa o te tau. Ko Alan Bunting, Mamaku takiwhitu, Noeline Taurua kaiako Rarauwhe Hiriwha me Glen Wilson kaiako poipātu āna hoa-whakaihuwaka. Nā Horouta te toa whakaihuwaka o ngā whakataetae a Ao i Tahiti i kapo. Hei tā Campbell ki a Te Kāea, he hōnore māna ki te noho ki te taumata o ērā atu, ka mutu he mea miharo te wikitōria mō te wā tuarua. Hei tāna anō, he tohu anō tērā o te whakaheke tōtā, o te angitu anō hoki.

Ko Gaibreill Wainohu tētahi ō āna kaihoe, e whitu āna mētara kōura i Tahiti. Nānā te tohu Tamawahine a Papatuanuku, mō te kaitākaro rangatahi wahine toa o te tau. Hei tā Wainohu, ko tōna tīpuna pāpā, ko Guy Wainohu rāua ko Campbell ōna iho pūmanawa Waka Ama. Hei tāna anō, ahakoa te pakeke o rāua tahi e whakapeto ngoi tonu ana rāua, e whakatauira tonu ana ki ngā rangatahi.

Nā tētahi o te ao Waka Ama tonu te hōnore i riwha mō te tāonga Toi Huarewa. Nā Marcus Thompson o Kāti Mamoe me Kai Tahu te tohu i kapo ake mō te kaipara hauā o te tau. Koia anō hoki tētahi toa o te ao i ngā whakataetae Waka Ama i Tahiti. Kāore a Thompson i te whakapono ka riro i a ia te tohu nei, heoi e harikoa tonu ana ia, ka mutu e whakaihi ana ia i te tohu ki tōna tīpuna whāea i mate nō nā tata nei, ka mutu ki tōna whānau, nā rātou ia i uru ki ngā waka ama.

I whakawhiwhia e Lewis Clareburt, kaikauhoe nō Waikato ki te tohu Tama a Ranginui mō te kaipara tāne rangatahi o te tau. He kaiuru tōmuri a Clareburt ki ngā whakataetae Hoawhenua ki te Tai Kōura, heoi i riro i a te mētara rauwhero i te wahanga Whenumi 400m.

Mō te katoa o ngā toa whakaihuwaka, pehia te pātene.