Warriors bashed by a cyclone

James Perry

Nō nā pō nei tuki ai te kapa Warriors ki ngā Storm o Poipiripi i te whakataetae NRL. Ahakoa ko ngā Warriors tētahi o ngā tino kapa i tēnei tau, i hinga rātou anō nei kua hoki anō ki te tau 2017. 

Mō te kapa Storm, he huripari kē te āhua. I haukerekere katoatia ngā Warriors i te taiwhanga AAMI i Poipiripi.

Tīmatahia ai i te mineti tuarua, ka whakawhiti e Ryley Jacks i te rārangi piro. 

Mō ngā rua tekau mineti ka whai atu ka kore ngā Warriors i kite i te pōro, hēoi e whā ngā piro ka riro i ngā Storm. Ko ētahi i to rātou ake pito o te whīra.

Hui katoa, e 6 ngā piro i riro i te Storm i te wehenga tuatahi, ko te tatauranga i te weherua ko te 36-0.

I puta kaha mai te kapa Warriors i te wehenga tuarua, na David Fusitua ngā piro tuatahi o te wehenga tuarua, hēoi kua oma rā anō te hoiho.

E rua anō ngā wā i whakawhiti e te Storm i te rārangi piro, i whana i a Cameron Smith i te katoa o ana whana whakaū. I te mutunga iho i toa a Melbourne 50-10. 

Nō te wharanga o Shaun Johnson rātou ko Tohu Harris me Solomone Kata i mua mai o te kēmu, kātahi ka hē kē atu i te wharanga o te pona o Isaac Luke. Me te mōhio anō kua whara a Nathaniel Roache, kei te inoi a Stephen Kearney mō tētahi rongo pai nō ngā tākuta.