Tuatara continue to look for improvement

James Perry

I hoki kiri haunga mai rātou i Perth i te rāuna tuatahi, heoi i tūraki e rātou ngā toa whakaihuwaka o tērā tau, i a Brisbane Bandits i te rāuna tuarua. E ōrea ana te kapa Auckland Tuatara, kia piki ki runga.

E whakarite ana te kapa poipapa ngaio hou, mō te rāuna tuatoru o te ABL ki a Canberra Cavalry. E rikarika ana rātou mō ngā tukinga hei ngā rangi whakatā nei. Hei tā te ringa tārake, hei tā Daniel Lamb-Hunt ki a Te Kāea kāore i tino eke te kapa i te rāuna tuatahi, ā i āta tōtika i te rāuna tuatahi ki a Brisbane, e kaha hiahia ana te kapa ki a tika rawa hei ngā rangi whakatā nei.

E kipakipa ana te kapa i tūraki ai i ngā toa whakaihuwaka, ngā Brisbane Bandits i tō rātou kēmu tuatahi ki te kainga, i te Rāmere kua pahure. Nāwai i harikoa, kātahi ka harikoa kē atu i te wikitōria tuarua i te kēmu tuarua i te Rātapu, hei tā Lamb-Hunt inā te hari ka kore rātou e noho kiri hāunga mō te katoa o te whatinga tuatahi nei. 
 


Auckland Tuatara training at Te Atatu's McLeod Park. Picture/file

Nā te uri o Ngāpuhi, Lamb-Hunt te omanga-kainga tuatahi o te kapa nei, i te kēmu tuarua, ki tōna karapu o mua ki a Bandits. Ko te mea mīharo ki a ia i whai wāhi tōna whānau ki te mātaki, kua noho a Lamb-Hunt ki Tiamana i roto i ngā tau tata nei, kua kore te whānau e tino kite i ōna tākaro, nā tōna patu nui rātou i poho-kererū ai.

He kanohi kei te kapa Cavalry e mōhio pū nei e ngā kaitākaro o Aotearoa o te kapa Tuatara, arā ko te hoa Taimana Pango, ko Boss Moanaroa. Ko te hiahia o Lamb-Hunt ki a rangirua ngā whakaaro o Moanaroa i tōna kapa, hei tāna he tino toki a Moanaroa, ka mutu i te hiahia ngā Tuatara ki a ia engari auare ake.

Timata ai te kēmu tuatahi o ngā kēmu e whā hei te toru karaka āpōpō, ki McLeod Park, Te Atatu.