Kaupapa: Rugby League

Ko Adam Blair e mauri tau ana ngā Warriors

James Perry
  • Tāmaki Makaurau

He āhuatanga hou tēna e noho nei te kapa Warriors ki ngā karamatamata o te whakataetae NRL. Hei tā te kaiako a Stephen Kearney ko ngā wheakoranga o ngā kaitakaro pērā kia Adam Blair e mauri tau ana te kapa.
Ko tāna anō kua kaha a Adam Blair, otirā ngā kaitakaro hou o te kapa ki te akiaki, ki te poipoi i ngā poumua, waihoki ngā mea rangatahi.


Hei tā Blair tonu, ko te noho hūmarie, me te noho pono kē e hāpai ana i te kapa kia mākohakoha te noho.
Ko te poipoi i ngā rangatahi kia pai ake ngā mahi ia rā te whāinga. Kia piki ake te kounga o ngā pukenga, i roto i te whare hākinakina. Ka mutu ko te whakapono anō ki te mahi, mēnā kei te hē, kōrerohia. I te mutunga iho, kia tau te wairua o te tangata kei pōhēhē ngā hoa kei runga te kōrero kei raro te rahurahu.

I a ia he huri aro atu ki tōnā kēmu hei ngā rangi whakatā nei, i te tutuki tona kura o mua a Whangarei Boys High kia Bream Bay College i te whiringa toa mō te whakataetae e mau nei i tōnā ingoa, arā te Adam Blair Cup.

He hōnore nui mōnā, ka mutu he mea hihiko anō i a ia, me te mea anō nō tōna hokinga mai ki Aotearoa e whai ana ia kia tonu ki tōna kainga ake kia hāpai tonu i ngā hāpori.


Hei te pō Rāhoroi e tū mai nei ka tutuki a Blair me te kapa Warriors ki ngā Cowboys ki Pā o Rarotonga.