Ka tū te Ipu o te Ao ki Māreia

James Perry

Hei te marama e tū mai nei, tū anō ai te Whakataetae Ipu o te Ao Rangatahi mō te Pā Whutupōro ki Māreia. E ono ngā kapa nō Aotearoa kā haere, kua tōpū atu rātou ki Kīngi Kāreti haratau ai.

Kua tekau mā toru tau te whakataetae rangatahi e moe ana, hēoi hei te marama nei ka tae atu ngā kapa wāhine, tāne, hanumi tekau mā waru, rua tekau tau o te ao ki Māreia.

Hei tā tētahi o ngā kaiako o ngā kapa, hei tā Hika Pene, "me noho ēnei whakatau ki te rūnanga nui, i tēnei wā kua whakaae, ka haere ki Āhia whakataetae ai. Kō tētahi rerekētanga i kōnei tēnei wā o te hotoke kei te hāere mātou ki tētahi wāhi wera rawa atu." 

Ko te wā o te Raumati tēnei ki Māreia, e matapae ana ka eke te pāmahana ō reira ki tua o te toru tekau waeine. 

Hei tā Leana Te Ohaere-Fox, kaiako o te kapa wāhine U18, he uaua kia whakarite i ngā kaitakaro mō ngā āhuatanga i Māreia. Kua mea atu ki a rātou kia mau ngā kākahu mahana, haratau ki rō whare aha atu, hēoi tē tāea te kaupare i ngā āhuatanga hou. 

Kua waimarie ngā kapa i ngā wheakoranga o ētahi kua whai wāhi atu ētahi ki ngā kapa matua o Aotearoa i te whakataetae kia Ahitereiria, pēnei i a Tarkyn Loloselo, o te kapa tāne rua tekau tau te pakeke. Ko ngā wheakoranga ka whakatō e ia ki āna hoa ko te matenui, ko te hiakai anō kia angitū ai rātou. Hei tā Te Ohaere-Fox, ko ngā tino hua kua kite e ia ko ngā pūkenga ārahi, i ngā kapa matua ka noho ēnei hei pīpī noa, hēoi i ēnei kapa kua noho rātou hei manu mātārae mō ngā hoa takaro. 

Nā Aotearoa te maringa nui i te whakataetae whakamutunga i te tau 2005, nā ka haere kiri kakara atu rātou ki Māreia, hei tā te Ohaere-Fox, kāore rātou mō te hoki kiri haunga mai.

Hei te 8 ki te 11 o Here Turi Kōkā tū ai te whakataetae Ipu o te Ao Rangatahi ki Kuala Lumpur, Māreia.