Kaupapa: Rugby

Hoki mai ana te poraka Invincibles a George Nepia ki Aotearoa

He pōraka nō te haerenga Invincibles i mau i te hautupua Ōpango, i a George Nepia e hoki mai ana ki Aotearoa i hokona e tētahi kāhui kaihokohoko muna nō konei i tōna hokotanga atu i Cardiff, Wērā i tēnei wiki.

Ināianei e kotahi ana te whānau Nepia ki te pōhiri mai i tēnei taonga, e iwa tekau mā tahi tau te pakeke.

Tekau mā iwa noaiho te pakeke o te koroua George Nepia, ko ia tonu rā te whetū nui o te kapa Invincibles i te toanga tuatahi o Aotearoa ki runga i a Wērā i te tau kotahi mano e iwa rau, e rua tekau mā whā.

Kua rongo te whānau Nepia i te reka o tētahi ope umanga, e ngākaunui ana ki te koroua, e hohonu ana ngā pūkoro i te pūtea. 

Ā, e hukahuka ana te waha a te ao whutupōro i te hokinga mai o tēnei taonga kahurangi o te motu.

I hokona atu te tuarua o ngā pōraka ki tētahi atu i Wērā mō te rima mano tāra, me te manako kia rite anō ia ki tōna mātāmua.  E whakapaetia ana ka tau mai anō te māuri o te taonga nei ki Aotearoa hei roto i ngā wiki e rua e tū mai nei.