Kaupapa: Rugby League

He "Wehi" kua whakatō ki rō pū i ngā Warriors mō te tukinga iwi taketake

Ruth Smith
  • Tāmaki Makaurau

Ko te iwi Māori e ngunguru ana.

“Ko tēnei kēmu he kēmu hei whakanui i ngā iwi taketake o Ahitereiria me ngā kaitākaro taketake o Aotearoa hoki” te kōrero a te kaiwhakahaere o Te Wehi Haka, a Tapeta Wehi.

Hai te Pōhoroi pōhiritia ai te kapa Roosters ki te rauna taketake tuatahi ka tū ki Aotearoa nei, me te aha, e rikarika ana a Māori ki te manaaki, ki te whakanui hoki i ō tātau matamatahūanga o tua o Te Moana Tāpokopoko a Tāwhaki.

“Ko te mea tuatahi ko te pōhiri, te karanga.  Whai atu i tēnā ko te wero, te matataki, haka pōhiri ko te whaikōrero me te karakia hei whakakapi i tērā wāhanga,” te whakamārama mai a Wehi.

Hai tā te Kaiwhakahaere o Te Wehi Haka, a Tapeta Wehi, he kaupapa hirahira tēnei mā te kapa Warriors, mā Ngāi Māori hoki.  Ā, ehara hoki i te mea he tauhou rātau ko tōna kapa haka ki tēnei mahi.

“I reira mātau i taua wā, i te kēmu tuatahi.  Nā reira koirā tā mātau hononga ki tēnei karapu,” tā Wehi.

Hai tā Wehi, e kitea ana ngā hua kua puta ki te kapa Warriors i ā rātau mahi whakatairanga i te reo me ngā tikanga.

“Ko tētahi o ngā tino hua kua kitea e au ka noho mātāmua ngā take Māori,” te kōrero a Wehi.

Mā te kaitākaro o mua, mā Wairangi Koopu te koha ki te kapa manuhiri e tuku hai te Pōhoroi i mua tata mai i te karawhiunga o ngā mahi ki Te Ipu Kura a Maki.