Kaupapa: NRL

E matakana ana nga Warriors i ngā Broncos

James Perry
  • Tāmaki Makaurau

He wiki hou, engari anō te kōrero mō ngā Warriors. Kei runga tonu rātou. I tērā wiki i hinga ngā Cowboys i a rātou, hēoi he hoariri anō nō Queensland ka tae atu ki te Pā o Rarotonga, ara ko ngā Brisbane Broncos.

Kua puhunghunga te haere mō ngā Broncos i tēnei tau. Kua rua noa nga wikitōria o ngā kēmu e rima. Engari e mōhio pū ana te kapa Warriors ka tere ara anō te kapa toa.

Hei tā te poumuri toa a Tohu Harris, kua roa nei ngā Broncos e whakaatu ana i tō rātou toa. Autaia katoa ana te kapa nō Brisbane, ā me pakanga mo te katoa o te kēmu, tae rawa ki te wawao whakamutunga.

I noho te kaiako a Stephen Kearney ki ngā rekereke o te koroua a Wayne Bennett, ruku ai i te puna mātauranga o te ao o te kaiako rīki. Hei tāna e hīkaka ana ngā Broncos kia tōtika ai tō rātou waka. Arā, me matua rite te kapa Warriors. 
Hei tāna anō, kāore e kore ka upoko pakaru ngā Broncos kia puta ai ngā ihu.

Kapi katoa ngā turu i te Pā o Rarotonga mō ngā kēmu matarua i tēra wiki, ā e īnoi ana te topatahi a Blake Green kia pērā anō ngā apataki hei te wiki e tu mai nei. Ka mutu, ko te rā mō ngā kaitakaro onamata, arā ka mau anō i ngā poraka motuhake i kitea i te tukinga ki ngā Roosters e rua wiki ki muri.

Hei te rima karaka o te Rāhoroi nei tīmata ai te kēmu ki te Pā o Rarotonga.