E angitū ana te karapu o Pōneke Kilbirnie i te whakataetae peihipaoro mō ngā tāne

Ko te rangi tuatoru tēnei o te whakataetae mō ngā kapa tāne ā-karapu o te motu ki te papa tākaro Rosedale, ā, e pai ana te haere o te karapu o Pōneke Kilbirnie.

Kei a rātou ngā kaitākaro Blacksox ō-mua, o-ināianei hoki, ā, he taitara ā-motu kē hoki wā rātou hei whakamana i tā rātou tū.

Nā reira ko te whāinga matua, ko te whakahoki anō i ētahi taonga whakaihuwaka ki te kāinga.

He tukinga me toa i te kapa Pōneke Kilbirnie ki te tira Vikings kia oti tuatahi ai i tā rātou puna.

I mua te kapa Vikings, e toru ki te rua i te huringa ki te pāeke whakarunga tuarima, kātahi ka kitea ngā whēako me ngā pūkenga o te whānau Makea kia puta kē tō rātou ihu ki mua.

Nā tēnei wikitōria i runga ake o te tira Vikings, i oti tuatahi ai rātou i tā rātou puna, e rima ngā wikitōria i ngā tukinga e rima.

Kei roto hoki a Jerome rāua ko Campbell i te kapa Blacksox whānui me te manako nui, ka whakaingoatia anō ai rāua ki taua kapa hei te Rātū mō te whakataetae a ao hei te Pipiri.

I ngā tau tekau mā rua kua huri, e whā noa ngā karapu kua eke ki te taumata o tēnei whakataetae, ā, ko Pōneke Kilbirnie tētahi o aua kapa.  E rua a rātou taitara i ngā tau tata nei.

Nā ō rātou whakapono me ngā hua kua kitea kētia, kei noho ka kore e tautoko i a rātou.