Tūtaki mai ki ngā kaiwhakataki reo Māori o te kiriata Moana

  • Tāmaki Makaurau

Nā ngā ringa tōhau nui tokotoru o Te Whare Wānanga o Tāmaki Makaurau te kiriata rongonui o Walt Disney arā ko Moana i whakamāori i mua i tōna whakarewanga hei Te Wiki o Te Reo Māori.

Ko tā tētahi o ngā kaiwhakataki reo, ko tā Vikky Demant, "Kei te tino rekareka nei. Kei te tatari kia tūwhera mai te kiriata nei ki te ao kia kitea mai te ao kia rangona te reo Māori kia parekareka mai o tatou tamariki."

Nā rātou te mahi i whakatūtuki i runga i te ngākau matatū.

E ai ki a Waldo Houia, "Ka mahi mātou, mutu ana ngā mahi o te whare wānanga nei ka huri atu mātou ki te kāinga o Tweedie ki reira te nuinga o te wa rua karaka ka tae ki te kāinga."

Ēngari, ko tā te tokotoru, ahakoa ngā taero ā-kupe, kāore rātou i pāhunu noa nā te nui o te kaupapa.

Ko tā Demant, "Ia te wā e noho ana mātou ki te mahi i ngā mahi nei ko rātou tonu kei mua i o mātou whatumanawa. Ia te wā ka whakaaro mātou, pēhea ngā kōrero ki ngā tamariki ki te reanga kei te tipu."

Hui mai, hui atu, i kuhu te rōpū ki te aro turuki i te reo o ngā kiripuaki, ki te hāpai anō hoki i te kounga o te reo.

E ai ki a Katarina Edmonds, "Ko te pai o Rob nā te mea nō te kāinga. Ka taea e mātou te tohutohu ka noho tahi i runga i te whanaungatanga me te kōrero tahi ngāwari te kōrero ki a ia."

Ka rewa te kiriata Moana Reo Māori hei te Rāhina e tū mai nei.