Turuturu ana te korohū nā te tukinga o tētahi pahi i Whangarei

  • Te Tai Tokerau

Whai muri i te tukinga a tētahi pahi ki tētahi o ngā papu ki tētahi whare penehīni 'Z'.  Ka rāhui mai tētahi rohe e ono rau mita te pūtoro.

E ai ki tētahi kaihono, "Rere ana ngā tāngata tīnei ahi, e whakatahia ana i ngā whare o Wilkinson Ave.  I ui atu ahau he aha te take, ko tā rātou ki ahau, i patu tētahi taraka penehīnu i te papu, ā, turuturu ana te korohū."

Me te whakatahi a te tini i ō rātou kāinga me ngā kura e pātata ana, nā runga i te tūpono ka pakaru mai he pakūtanga nunui.

Kīhai ngā pirihimana me ngā kaipatu ahi i kōrero ā-kāmera mai ki a Te Kāea, engari i mutu ngā mahi whakatikatika me te hiki o te rāhui i te takiwā o te tekau karaka.

Mō ētahi o ngā kainoho, i te ohorere katoa ki te take i rāhuitia tō rātou taone.

Horekau hoki te kaitaraiwa o te pahi i whakaae kia kōrero mai, heoi ko tā Vector Energy, e whakahīhi ana rātou kua taupokingia te korohū me te tūpono parekura.