Ngā kaupapa: Education, Employment

Tohu nēhi Māori e hapai i ngā tūnga mahi

  • Waikato/Te Waiariki

O ngā tauira rua rau i puta ō rātou ihu ki Whakatāne, i te hui whakapōtae a Te Whare Wananga o Awanuiarangi he tekau ma iwa katoa nga nēhi Māori. He ara ki tua mā ngā nēhi Māori i ngā whakawhanaketanga ki tētahi tohu mātauranga hōu.

Ko Maddie Mason tētahi o ngā paetahi tekau ma iwa kua whiwhi i tētahi tohu paetahi pūtaiao hauora nēhi Māori.

“Kei te whakaaro ake ahau i tōku ōrokohanga mai. Nōku te whiwhi mai i a Awanuiārangi kei reira ngā tauoko, kei reira ngā māngai korero me ngā hoa kua tae au ki konei i tēnei rā,” tana kii.

E ai ki Te Whare Wānanga o Awanuiārangi, e whitu paihēneti o ngā kaimahi nēhi katoa he Māori, mai ēnei tauira ka haere hei hiki ake i tērā paihēneti.

Ki tā Haturini McGravey hoki, “Ka puta ki ngā hapori, hapori Māori, hapori Pākehā i roto i ngā hauora Māori, hauora auraki puta noa i te motu, na te mea ko te kaha o ngā tātau te iwi Māori, ngā tūroro Māori kei roto i te hōhipera, engari kei te poto ngā nēhi Māori.”

Ki tā Nanaia Mahuta, Minita Whakawhanake Māori, “Ko te mea pai, kia haere, kia haria a rātou mātauranga i roto i aua mahi, ana ki ngā wāhi katoa, ki ngā hōhipera he mea nunui tērā mo a tātau tāngata Māori.”

Kei te whai tētahi o ngā paetahi i te ara nēhi na runga i ōna ake kitenga ki ao hauora.

Hei tā Rangiwhanake Sonja, “Ka titiro au ki tōku whānau, kei a rātou te mate huka te nuinga o rātou kua mate nō reira ka aro au ki te tohu nēhi."

Ko ēnei nēhi ētahi o ngā tauira e toru mano te nui ka whiwhi tohu ki te whare wānanga i tēnei tau.