Te Whakahē a Ngāti Whātua Ōrākei ki te Kawenata Tiriti o Ngāti Pāoa

  • Tāmaki Makaurau

He tauira o te kawenata whakataunga kua āmenehia e Ngāti Pāoa me Te Karauna e rua tekau mā toru ira rima miriona tāra tōna wāriu. Ēngari tērā te whakahē a ō rātou whanaunga, a Ngāti Whātua Ōrākei e mea ana he mahi huna tā te Minita Take Tiriti waitohu i te whakaaetanga nei.

E tohea ana e Ngāti Whātua Ōrakei ētahi whenua kei te kawenata whakaae o Ngāti Paoa me te Minita Take Tiriti.

Tā Renata Blair mema poari mō Ngāti Whātua Ōrākei, "E tuku ana a Minita Finlayson i ērā o ngā whenua tapu o Ngāti Whātua i roto i tō mātou nei takiwa, koira tō mātou nei nawe ki te Minita, kaua e tuku aua nā whenua ki tētahi atu iwi."

Kei Te Kōti Āpīra, ā, ko tā Ngāti Whātua Ōrākei ki ngā mahi a te Minita, he whakahīhī, he kino.

"I tuku mātou ērā o ngā reta, ngā īmera ki te Minita ia wiki ia wiki ki te kōrero ēngari kāre ia e hiahia ana ki te tūtaki anō nā te mea ko rātou nā mahi i tēnei wā ki te haina ngā kereme a tēnā, tēnā nā te mea e tere ana te wā pōtītanga whānui o Aotearoa."
 
Ko te whakahoki a Ngāti Paoa, ko tā Ngāti Whātua Ōrākei he tohatoha moni maha te āhua o tana mahi ki te kōti.

Tā Hauauru Rawiri, kaiwhiriwhiri mō Ngāti Paoa "Ko tāku ki aku whanaunga o Ngāti Whātua Ōrākei me hoki atu ki te marae kei reira te ātea, ka tāea e tātou te whiriwhiri i ngā kōrero, te whai hua, te whai oranga mō ō tātou uri whakatupu."

Tā Hauauru Rawiri e whai haere noa iho nei rātou te huarahi i takahia e Ngāti Whātua Ōrākei ki te tutuki tō rātou kereme i Tāmaki Makaurau.

"Ko te whainga kia whakahoki atu ki tō mātou iwi kei reira te mana kei reira te kōrero mutunga, te whakaae, te whakakao rānei."

Ka tuku te tauira o te kawenata whakaae a Ngāti Pāoa me Te Karauna ki te iwi, me tā Hauauru Rawiri tumanako ka mutu ngā mahi whiriwhiri a te iwi hei te pounga o tēnei tau.

Mō ētahi anō kōrero e pā ana ki te kawenata whakaae a Ngāti Paoa me Te Karauna https://www.govt.nz/treaty-settlement-documents/ngati-paoa/