Kaupapa: Arts

Te Waka Toi Awards mark 30th year

  • Te Tai Tokerau
  • Tāmaki Makaurau
  • Waikato/Te Waiariki
  • Te Tai Hauāuru
  • Te Tai Rāwhiti
  • Te Whanganui-ā-Tara
  • Te Waipounamu

Mō āna mahi mutunga kore e pā ana ki ngā waka moana Māori, i whakanui Te Waka Toi i a Hoturoa Barclay-Kerr ki te pō tohu a te ohu toi Māori i Rotorua, i te tau toru tekau o ēnei tohu whakanui i ngā ringa toi Māori.

E rongonui ana te matanga waka nei a Hoturoa Barclay- Kerr huri noa i Te Moana nui a Kiwa mo tana tere i te moana nui mā runga waka tūpuna.

Hei tā Hoturoa Kerr (Waikato, Tainui), “Ko ngā mahi hoe waka, whakatere waka a ō tātau tipuna, tārai waka ērā mea kātoa, he taonga hei whakaatu ki te ao.”

Ko ia tētahi o ngā kaitoi Māori tokowaru i whakanuia i te pō tohu o Te Waka Toi ki Te Rau Aroha ki Rotorua.

Ko tā Taiarahia Black (Mēmā kaunihera, Te Waka Toi), “Te hunga ka whakawhiwhia ki ngā tohu nei kua kitea rātou ki te motu, kei te mārama a rātou tuhituhi, a rātou kōrero, a rātou tohutohu, ki roto i to tātau hinengaro, ngakau, wairua, tēnei pō he whakanui i a rātou. 

Mō āna mahi whakamiharo i roto i ngā toi, i whakawhiwhia ki a Patricia Grace te tohu o Te Arikinui Te Atairangikaahu.  Ka whai ake he tuku tohu ki a Keri Kaa, Te Kanawa Pitiroi, Hokimoana Te Rika-Hekerangi me Ahorangi Piri Sciascia i riro i te tohu o Tā Kingi Ihaka. 

Hei tā Piri Sciascia (Ngāti Kahungunu), “E ora ai tō tātau iwi ki roto i ngā mahi toi, kei reira rā tētahi tino rangatira tangata ki to tātau mana motuhake ki roto i ēnei kaupapa toi. 

Mō te tohu o Ngoi Kumeroa Pewhairangi mō te whakapakari i te reo Māori i tukua ki a Mana Elizabeth (Liz) Hunkin.  Ka mutu mo ngā manu pīrere toi Māori i whakawhiwhia ki a Cori Marsters rāua ko Te Kanawa Ngarotata, rāua tahi i riro ki te rima mano tāra.