Te Kapa Riiki Māori o te rēanga rua tekau te pakeke.

Tema Hemi
  • Tāmaki Makaurau

Ka tākaro atu te kapa Māori o Tāmaki Makaurau i te reanga rua tekau tau te pakeke me raro iho, ki tērā o Toa Hāmoa ki te taiwhanga o Mt Smart āpōpō.  Ko te Mann Cup te paraihe, he taonga e whakanui nei i te whānau rongonui o te ao rīki. 

I karahuihui mai te kāhui pouako me ngā kaitākaro o te kapa riiki Māori rua tekau te pakeke ki tā rātou whakaharatau i tēnei rā, kia whai i te rautaki tika mo tā rātou tākaro nui āpōpō. 

Ko tā te kōrero o te kaiako o te kapa a Neville Rogers, "Kua tāpiritia mai ko ētahi kaitākaro ā he painga mo mātou tērā. Tokorua ngā tama nō te kapa Tamatoa kua whakawātea mai ki te tākaro whakaihiihi i te kapa."

Anō nei ki ngā kapa toa he take nui kia kōtahi ai te kapa i te whakaaro kōtahi kia eke panuku ai rātou i te kēmu. 

Ko tā Rogers anō, "Ko te whakawhanaungatanga me te kōtahitanga ki te aro ā kapa he mea nui ki ā mātou."

Ko Te Reo Māori me ōna tikanga ka noho matua tonu mā ngā kapa Māori katoa.

Ka mutu a Rogers me tēnei kōrero, "Me tirohia ki te mana o te poraka. Kua āta korerohia ēnei take me te mea hoki kia honohono mai ētahi o ngā tama ki tō rātou taha Māori."

He ai ki te kōrero a te kāpene o te kapa, kua pakaru āna kerekere ki te arahi i tōna kapa. 

Ko tā Wyatt Tutere Rangi, "Ka kaha au ki te kōrero me te whakatauira i te huarahi tika. Whakahīhī katoa ahau ki te whakakanohi o tōku whānau."

Ā mō ētahi kore kau he hōnore nui i tua atu i te whakakanohi i te iwi.  

Ko tā te kōrero a Tayhler Paora kaitākaro mo te kapa Māori, "Kei te hīkaka katoa au, he hōnore nui hoki mōku kia hāpai nei i tōku Māoritanga."

Mo te nuinga ō ēnei kaitākaro ko te tino pae tawhiti kia whai kirimana i te NRL engari mo tenei wā ko te aronga nui ko te hoariri a Toa Samoa. Ka timata te kēmu nei hei te poututanga o te rā.