Mātaatua youth offer advice to Te Mātāwai at speech competiton

  • Waikato/Te Waiariki

Me uru atu ngā whakataetae manu kōrero hei kaupapa matua mo ngā mahi a ngā māngai o Te Mātāwai, i te mea kāre nga rangatahi e whai wāhi atu kia tū ki te kōrero ki roto i a rātou ake iwi. Koira te karanga a ngā kaiako i te whakataetae o ngā manu kōrero ki te rohe o Mātātua i Tauranga.

He karanga mai i ngā manu kōrero i te rohe o Mātaatua ki ngā māngai e tohua ana ki te Poari o Te Mātāwai.

Hei tā Tuihana Pook mai Te Kura Mana Māori o Whangaparaoa, “Ko te tono ki te Mātāwai mehemea kāre ēnei tūmomo hui e tautokohia mai i wa rātou mahi, ā, kāre au i te kite ētahi atu wāhi ka tū wa tātau rangatahi i roto i o rātou iwi.”

Tokotoru ngā tāngata ka tohua ki Te Mātāwai ko Willie Jackson mo ngā iwi noho tāone, ko Betham Ohia mo Mātātua rātou ko Jeremy Tatere Mcleod mo Te Tairāwhiti.

Hei tā Pook, “Kō tāku māharahara noa iho, ā, mo ngā wāhine tokohia ngā wāhine ka kuhu atu i roto i tērā rōpū, engari ko te kaupapa o Te Mātāwai, āe, ka te wā pea ka kitea ngā hua.”

Kei te taunaki a Te Mātāwai i te kāwanatanga hei whakawhanake i ngā rautaki reo māori hei hiki i te mātauranga ki te reo me te rahi o te hunga kōrero māori

E ai ki a Safia Gower mai Te Kura Kaupapa Māori o Te Orini ki Ngāti Awa, “Ko ēnei kōrero ka puta ki ngā taiohi, ngā rangatahi, ā, ka ora te reo mena ka rongo atu rātou ki ēnei kōrero, ae, ko te tumanako ka ora to tatau reo.”

Hei tā Tamihana Thompson Te Ua nō Ngāti Awa, Tūhoe, “Ki te tū mātou, he kanohi kitea mo to tātau ao Māori, mo to tatau Māoritanga, kia kore e mate te reo, anei ngā taiohi e tū, e kōrero na i to mātou reo, i te reo o to mātou tipuna.”

Tokowhā ngā mema kāre anō kia tau noa mo Te Mātāwai. Kāre e kore he kaupapa nui a Te Mātāwai ki te whakataetae manu kōrero ā motu ka tū ki Te Taitokerau a te marama o Māhuru.