Kaupapa: Te Reo Māori

Kua whakahōnoretia a Whatarangi Winiata kia whakawhiwhia ki Te Tohu Oranga Angitu

Mānia Clarke
  • Te Whanganui-ā-Tara

Kua whakamanamana te uri nō Ngāti Raukawa, he ika ā-whiro mātauranga Māori, a Ahorangi Whatarangi Winiata ka whakawhiwhia ki Te Tohu Oranga Angitu i Ngā Tohu Reo Māori i tēnei tau, mō āna whakapau kaha mō te whakarauoratanga i te reo Māori i ngā tau e rima tekau neke atu.

He tangata iti te kupu a Ahorangi Whatarangi Winiata, nā e kore te kumara e kōrero ana mo tōna ake reka.

“Ka hoki ōna mahara ki te hunga i tino manaaki nei i a ia, i ōna wawatā, wāna mahere, i wana mahi i roto i ngā tau,” i mea atu te tama a Whatarangi, arā ko Pakeke.

“Ko tāna ko rātou kē te hunga me whakanui, kaua ko ia.”

Nō tērā rau tau whitu tekau mā rima, koia te tuatahi i kōkiri ai i tētehi rautaki whakaora reo Māori e kī ana Whakatupuranga rua mano, i te tāmatemate o te reo, kāore e rangona i te rohe o Kāpiti, i ngā tiriti o Ōtaki hoki.

“Kia hoki mai hei reo matua mō tōna whānau ake, ka tahi, mō ōna karanga hapū ka rua, mō te iwi ka toru, mō te iwi Māori ka whā,” i kī atu a Pakeke.

I ngā tau waru tekau me te iwi tekau nā rātou te tira kiriūka i mate ururoa ki te whawhai ki te kāwanatanga mō te oranga o te Reo, nā whai anō i whakatūria te Taura Whiri i Te Reo me ngā Reo Irirangi Māori.

Wheoi mōna ake, ko te poipoi i te pāharakeke i te reo Māori te tino matū kia ora tonu ai te reo

“Ko tāna, me pai ake āku tamariki i au me tīmata i reira. Nā ko ērā atu mahere kei waho tonu, ka whāia tonutia, engari koina te mea matua, kia pai ake āna tamariki i a ia ki te kōrero Māori.”

Mohoa nei, e rima tekau ōrau o ngā kāinga i te taone o Ōtaki he kōrero Māori.