Kua whakahokia atu ētahi epa tawhito rawa ki te iwi o Te Āti Awa

  • Te Tai Hauāuru

Riro taonga atu, hoki taonga mai.  Koia te kōrero mō te iwi o Te Āti Awa, otirā mō te hapū o Ngāti Rahiri, i te whakahokitanga atu o ētahi epa tawhito rawa ki waenga i a rātou i te rangi nei.

Neke atu i te whā tekau tau ngā epa e ngaro ana ki tāwāhi, tūturu he pūrākau mīharo tā ēnei taonga.

Kei te whare pupuri taonga o Puke Ariki, te kainga hou mō ngā epa e rima o Motunui.  Ko ngā epa te pakitara o muri o tētahi pataka, tata ki te rua rau tau te pakeke.  Nōreira te whakahirahiratanga o tēnei taonga tawhito.

I raro i te korowai o te pō whakahokia mai ai ngā epa o Motunui ki tō rātou ūkaipō.

E ai ki a Mahau Waru, “Orite ki te wā tuatahi i kite atu te ataahuatanga o ngā taonga, te ataahua.”

I whakairotia ngā epa i mua atu i ngā tau kotahi mano waru rau rua tekau.  I hunaia ki rō repo ki Motunui, ā, i reira kitea ai i te tau kotahi mano iwa rau whitu tekau mā rua.  Heoi, kotahi tau whai muri mai ka hokona atu ki tāwāhi.

Hei tā Mahau Waru, “Tino mamae, tino riri, kohete hoki, te mamae o ngā tauheke kōrero mai i runga tō tātou marae ki roto i konei a Te Ngarue.”

Neke atu i te whā tekau tau te kāwanatanga me te iwi e pakanga ana kia whakahokia mai ngā epa, nō tērā tau noa tutuki ai.

Heoi, mō te iwi o Te Ati Awa me te hapū o Ngāti Rahiri, koinei te wā tuatahi kua kite a kanohi nei rātou i ēnei taonga tuku iho o rātou.

Ka noho ngā epa o Motunui ki te whare pupuri taonga o Puke Ariki.  Heoi, ko te wawata nui ina hangaia te marae o Ngāti Rahiri ka whakahokia ki te hapū.

Ā, tūturu ko te mana kaipupuri tērā e whaia ana e rātou, i tēnei wā kei te kāwanatanga tonu.

E ai ki a Mahau Waru, “Ka hanga mai he marae anō mā tātou mā Ngāti Rahiri tēnā anō te wā te whakaaro atu nei pewhea rā ka neke mai ki a tātou marae.”

Kahore anō tēnei take kia tau noa, heoi, ko te mea nui kua hoki mai ngā taonga ki tō rātou kainga tūturu.