Kua wātea Te Pāti Māori i Te Whare Pāremata

Heeni Brown
  • Te Whanganui-ā-Tara

I tēnei rā poroporoakitia ai Te Pāti Māori i te Whare Pāremata.

Ki roto o Mātangireira, nā Kura Moeau ngā karakia i ūhi ki runga i ngā kaiārahi, ki a Te Ururoa Flavell me Marama Fox me ngā kaimahi o te Pāti Māori, e ea ai te tekau mā rua tau te pāti e noho nei i Te Ana o te Raiona. 

Tā Flavell, ko te anga whakamua rātou ki te hanga huarahi hou mō te rōpū tōrangapū.

A, whai muri i ngā kōwhiringa pōti, kua whakaritea e ngā pou mua o te rōpū, i tētahi hui mā ōnā mema e āhei ai rātou te whakarite kaupapa hou mō te pāti. 

Hei te tuarima o ngā rā o Nōema tū ai ki Tāmaki Makaurau.

Tā Te Ururoa, "Kei te āhua pā pōuri te ngākau, ēngari koinei te āhua o te noho ki konei mō ngā tekau mā rua tau. Pēhea e kore ai? E tau mai a pōuri, a taumaha? Engari kei te pai kua ora te ngākau na runga i te āhuatanga o te hokinga mai ki konei karakia ai, ka mutu poroporoaki ai i tō mātou tīma, tō mātou rōpū o Te Pāti Māori."

Tā Marama, "Kāre au i te tangi, i te pukuriri mōku ano. Engari mō Te Ururoa me tōnā whānau me ngā tau kua pahure ake kua whakapau werawera, kua whakapau kaha nei. Kāre e tāea e ia te tū ki rō whare hei tuku i tōnā kōrero whakamutunga nā reira ki a au nei rawe tēnei hei wātea i te ara kei mua mō Te Pāti, otirā mō ngā kaimahi i roto i Te Pāti Māori."