Kaupapa: Politics

Kua tohu a Bentham Ohia hei perehitini tāne tuarua hōu o te Pāti Māori

  • Te Tai Tokerau
  • Tāmaki Makaurau
  • Waikato/Te Waiariki
  • Te Tai Hauāuru
  • Te Tai Rāwhiti
  • Te Whanganui-ā-Tara
  • Te Waipounamu

Kua tohu a Bentham Ohia hei perehītini tāne tuarua hōu o Te Pāti Māori.

E ai ki te perehitini o te Pāti, e ai ki a Che Wilson ko Ohia te tangata hāngai ki tā rātou ahunga hōu kia hoki ai te whakapono o ngā kaipōti Māori ki te Pāti hei te kōwhiringa a te pōtitanga e tū mai nei. 

“Kei te koa, kei te ora te ngākau tōna whakaae mai me te tautoko o te Pāti i a ia,” i mea atu a Wilson.

Kīhai te Pāti Māori i hoki ki te whare pāremata i tērā tau, whai muri i te hingatanga ohorere o te mema pāremata o mua o Te Wairiki a Flavell me te korenga o ngā kaitono e eke i ō rātou rohe pōti.

“I motu te hono i waenga i a mātou me ngā hapori me ngā whānau. Ko tā mātou i tēnei wā ki te tuitui anō i āua here.”

I noho a Ohia hei tumuwhakarae mō Te Wānanga o Aotearoa mō ngā tau e waru.

E ai ki a Wilson mai i te wā o tā rātou hinganga ohorere, kua āta arotakengia ngā take ā, ko te kore whakamārama atu ā rātou kaupapa tētehi o ngā ngoikoretanga.

Hei tāna e whakapono ana rātou kei a Ohia ngā pūkenga e hāngai pū ana ki tēnei āhuatanga.

“He nui āna mahi me ngā whānau me ngā hapori puta noa i te motu,” i kī atu ia, “me te rawe o āna pūkenga ki te kōrerorero ki te tangata ahakoa ko wai, ahakoa nō whea. Koia tētehi e mātau ana ki ērā tū āhua kia hono ki te ngākau a tangata kia pōti mai.”

Ka kōwhiri te Pāti i ā rātou kaiārahi hōu hei mua i te kōwhiringa pōti e tū nei, mohoa nei, ko te whakawhānui i ngā mema me te āta tuhi i ngā kaupapa here te mahi matua.