Ngā kaupapa: Housing, Tainui

Ko te whiu a Fox kia rahi ake ngā mahi i kaupapa o Te Ara Mauwhare

Mānia Clarke
  • Waikato/Te Waiariki

E tautoko ana te kaiārahi takirua o mua o Te Pāti Māori a Marama Fox ka hoko ētahi whānau pōhara i ō rātou ake whare i raro i te kaupapa  whakamātautau o Te Ara Mauwhare.

Heoi hei tāna anō, he ngoikore ake te kaupapa rā i tā rāua ko tōna hoa takirua o mua ko Te Ururoa Flavell i kōkiri.

Kei te hurō a Fox ka tautokohia ngā whānau o Te Uepu Whānau Ora o Te Tihi o Ruahine ki te hoko whare nō rātou e utu reti ana, wheoi, ko tāna anō, me rahi ake ngā mahi.

“Kia kaha mai Nanaia ēnei kaupapa here, Working for Families Tax Credit, accomodation supplement, income related rent subsidy, kei te utu noaiho i te whare mō tētahi atu,” i mea atu ia.

E tino mōhio ana te kaitōrangapū o mua ki ngā piki me ngā heke o te hanga whare.

Mohoa nei i utu ia i tana nama kotahi rau ono tekau mano tāra ki ngā kaituku moni mō tana kaupapa hanga whare ngāwari te utu, whai muri i tōna wehenga i te ao tōrangapu.

“Me āta wānanga ngā tangata e tū kei mua i a koe te kī, kei te āwhina, kei a rātou te pūtea whakatū wēnei whare, nō te mea ahakoa te hiahia, tuatahi kei hea te pūtea.”

E whā atu ngā rōpū Māori i raro i te whakamātautau, arā, Te Taiwhenua o Heretaunga, Port Nicholson Block Settlement Trust, Te Rūnanganui o Ngāti Porou me Chatham Islands Housing Partnership Trust.

I whakapā atu mātou ki te tari o Nanaia Mahuta, wheoi kāore ia i te wātea ki te whakahoki kōrero.