Ngā kaupapa: Entertainment, Kapa Haka, Te Reo Māori

Ko te kapa haka o Te Kāhui Huringa te kai whakaihuwaka hōu mō ngā kura tuatahi o Tāmaki

  • Tāmaki Makaurau

Ko te kapa haka o Te Kāhui Huringa mai i te kura tuatahi o Whinireihana te toa whakaihuwaka hōu o te whakataetae kapa haka ngā kura tuatahi, kura takawaenga hoki o Tāmaki Makaurau.

I eke Te Kura Māori o Ngā Tapuwae ki te taumata tuarua, ko Te Kura Takawaenga o Henderson ki te tūnga tuatoru.

Nō reira ka haere rātou ko Te Kura Kaupapa Māori o Hoani Waititi, Te Kura Kaupapa Māori-ā-rohe o Māngere, ko Te KKM o Puau Te Moananui-a-Kiwa hei kanohi mō Tāmaki Makaurau ki te Whakataetae Kapahaka ā-motu o Te Mana Kuratahi.

E ai ki te kaiwhakahaere o Te Kāhui Huringa Rūmaki Reo mai i te kura hautu, e ai ki a Lisa Takuira, ko te kaupapa matua mō rātou he whakamānawa ngātahi i ngā tamariki mai i ngā kura auraki me ngā kura kaupapa Māori atu.

Hei tā Takuira mā te hiki i te ihi, te wehi me te wana kia Māori ai te noho a ngā ākonga i roto i ngā kura auraki.

“He uaua mō te tamaiti Māori e noho ana ki te kura auraki, te whai pānga ki tōna Māoritanga,” i kī atu ia.

“Te nuinga o wēnei nā, kua kore e haere ki tētahi marae, kua kore mahi kapa haka i mua noa rā i tēnei tau, kua kore rānei e kōrero i te reo.”

Ko tā Takuira ko te kapahaka te waka hei whāngai i ēnei whakatupuranga ki te Māoritanga.

“He pai ki te kite i ngā tangata kuhu mai i roto i tō mātou kura,” i mea atu te kaitākaki kōhine a Kahurangi Goldring.

“Pai, nā te mea ka taea e au te kite ōku hoa mahi i ngā mahi ā-rēhia,” i kōrero atu te kaihaka a Rehua Honetana-Paea.

“Wētahi o rātou nō tō mātou taha reo rua Hāmoa, ko tāku ki a rātou, mātou katoa he uri whakaheke i a Māui Tikitiki, tēnā whakapiri mai,” i kī atu a Takuira, “whakaatuhia tō taha Māori i raro i te kāwai hekenga o Māui Tikitiki, wētahi ō rātou nō te taha auraki, nō te taha reo rua hoki.”

E toru tekau mā toru i tū ki te papatūwaewae mō ngā rā e rua, me te pai a ngā mahi, te tirohanga o ngā kaiwhakawā.

“Kei runga noa atu te taumata,” i mea atu a Hohua Mohi kaiwhakawā nō rā waho.

“Pēnā ia ko ēnei ngā kaitakatakahi te ātāmira o āpōpō, hāneanea katoa ana te ngākau mō te āpōpō.”

Ka tū Te Mana Kuratahi ki te rohe o Waikato, ā tērā tau.