Kaupapa: Elections

Ko tā ngā kaikōrero tōrangapū, ko te Pāti Māori te papa

Heeni Brown
  • Tāmaki Makaurau

Ko Te Pāti Māori te papa o te mahutatanga ake o ngā rangatira hou o te rōpū Reipa ki te pae, koinei tā ngā kaikōrero tōrangapū Māori i a Ngahuia Wade rāua ko Roihana Nuri. Ko tā rāua e mea ana, ko te ngau tēnei a 'Te Ken me te Te Barbie'.

Tā Ngahuia Wade, "Inā kua puta mai a Ken rāua ko Barbie, ooh tērā pea ka raru."

Ko te au o Jacinda Ardern rāua ko Kelvin Davis tērā e rangona ana i ngā pōti o te motu. A, me tūpato rā te Pāti Māori ki te au o 'Te Ken me te Barbie' nei.

"O ngā rōpū katoa, o ngā pāti katoa o te ao tōrangapū, ko rātou me awangawanga ka tika, ko rātou kei te raru i tēnei wā."

Ko tā Ngāhuia Wade rāua ko Roihana Nuri e whakapono nei, ka uaua te huarahi a Te Pāti Māori ki te wikitoria i a Tāmaki Makaurau me Ikaroa-Rāwhiti.  

Tā Roihana Nuri, "Kāore te iwi whānui e kōrerotia ana, kei te kaha kē tātou te kōrero mō Reipā, kei te kaha kē tātou te kōrero mō Ngā Kākāriki, nā reira, kei whea te Pāti Māori."

Engari ehara i te mea ka raru katoa te Pāti Māori. Ko tā ngā kaikōrero tōrangapū e matapae nei, ko ngā pōti a Metiria Turei he mea tohatoha ki te Pāti Māori.

"Kōtahi anake te oranga mō Te Pāti Māori, te kaha tautoko i a Mei Taare Reedy nōtemea kei reira a Metiria. Kāre e kore ka ngakau aroha te hunga kaipōti ki a Metiria, nā reira ka tohu, ka pōti rātou mōnā."