"Kei te wātea te reo Māori ki te katoa", Koromatua Meng Foon

Te Kuru o te Marama Dewes
  • Te Tai Rāwhiti

Kua rua tekau mā whā tau a ia e mahi ana i Te Kaunihera o Te Tairāwhiti, ā, kua whakatauhia e Meng Foon ka mutu ana mahi tōrangapū i tēnei tau. Ka mutu, ko ia tonu te koromatua reo Māori kotahi huri i Aotearoa.

Hei tā Meng Foon kei te wātea te reo Māori mō te katoa.

“Kua tarae wētahi, mena he ngākau nui he māmā mō te tangata ki te ako, mēnā kāre i te pīrangi he uaua koretake moumou taima”, te kī a Foon.

He kaikōrero ki ngā reo irirangi Māori, he kanohi kitea ki ngā marae maha, i a ia e tū ana ki te whaikōrero.

“He nui ngā pāpā he nui ngā kūia tipua o taua wā poipoi nei i auwa kei rō i tāku nei huarahi ki te ako, kāre wau i mōhio i taua wā te waimārietanga te painga o tēnei te taonga kei rō i auwa”, te kī a Meng.

Nō te tau 2001 tohua ake ai a Meng Foon hei koromatua ki Te Kaunihera o Te Tairāwhiti. Hei tāna hei tā Foon, mā te reo Māori e mārama ai ia ki ngā take o te ao Māori.

“Rerekē te reo Īngarihi i o rātau kōrero ki auwa, kei te mātautau wau ki ngā iwi whānui katoa te Tairāwhiti, ka taea e au ki te tarai kaha ki te whakapai a rātau kaupapa i te tēpū o te kaunihera”, te kī a Meng.

Nā Meng Foon te waiata Tū Mai Hikurangi i tuhi hei whakanui i a Tākuta Apirana Mahuika o Ngāti Porou, he momo kaiarahi ki a ia i ngā tau.

Hei tāna, “E pā ana ki ngā kōrero o te kāenga nei ngā tipua ko Nukutaimemeha me kī Hikurangi maunga tae noa ki te pupuri nei te whenua, koira te whakaaro nui o tō tātau pāpā uncle Api ko tōna kī ehara mō mātau anake, mō ngā whakatipuranga kei te haramai.”

Ka mau tonu i a Meng Foon tana tūranga tae noa ki te Oketopa.