Kei te hīa ake ai te wiwi Naati ki te kāenga

Te Kuru o te Marama Dewes
  • Te Tai Rāwhiti

Ko ngā Pā Wars o Ngāti Porou kei te tūhonohono anō i ngā uri ki ō rātou marae, otirā ki ō rātou wā kāinga. He mea nui tēnā i runga anō i te mōhio, he tata ki te haurua o taupori o o te iwi nei e noho marara atui ana ki waho o Te Tairāwhiti.

Ko tā Les Hoerara o Te Whānau a Tuwhakairiora, “Pai ake ki a au te nui o ngā taitamariki kua tae ā tinana mai i tēnei wā,  te nui hoki o ngā marae”.

Ko te whakataetae te aho e rarangatia ai ngā taura here marae o tēnā moka, o tēnā moka o Ngāti Porou.

Ko tā Te Ao Leach o Mangatuna ki Hinemaurea, “Kia whakahono atu ki tōku whānau anō me te tūmanako kia toa anō mātau i te taonga nei engari i tēnei wā ehara nō mātau, hei aha ko te mea nui ko te whakawhanaungatanga.

Nō te tau 1990 timata ai ngā Pā Wars, ā, kei te whanake tonu. Neke atu i te 21 ngā marae i tae ā tinana atu ki Ruatōria.

Hei tā Kararaina Ngatai-Melbourne o Te Whānau a Hinreupe, “Koina te āhuatanga o tēnei rā mā mātau katoa e tieki, ka hoki hoki anō ngā whānau mai waho kāre anō kia tae mai waenga o rātau waewae ki te whenua ki te hau kāenga”.

He tuatahi mā Haimona Te Nahu o Te Whānau a Hunaara arā hei tāna, “Nā reira me hoki mai, kia ora ai ngā tātai whakapapa, kia kā ai ngā ahi, kia horoia ngā rīhi me aua momo mahi katoa”.

Ko Te Whānau a Hinerupe ngā toa o Pā Wars mō te tau tuatoru.

Ko tā Tioreore Ngatai-Melbourne o Te Whānau a Hinerupe, “Harikoa katoa mō te whānau mō te hapū, i tākaro mō a tātau tīpuna, mō tō tātau nei tīpuna Hinerupe i tēnei rangi tino ataahua.