Kaupapa: Welfare

Ka rītaia tētahi o ngā kaitinei ahi tūao o Murupara

  • Waikato/Te Waiariki

Whitu tekau te pakeke o tētahi o ngā kaitinei ahi o te tari ahi o Murupara, kua haere ki runga i to rātou waka ahi mo te wā whakamutunga. Ahakoa kei te rītaia ia, ko tana tono ki te hapori o Murupara kia hono, kia tautoko hoki i to rātou tari ahi. Ahakoa kua toru tekau mā toru tau a Jack Tupe e kaitūao ana mo te tari patu ahi hei ko tāna ka mokemoke ana ia ki tēnei mahi.

“Kua kī au, kua tae ki te wā kua kore e tāea e te tinana te whakahaere i ngā kaupapa inaianei.” Ko Jack tētahi o ngā āpiha tokotoru o te tari nei. I tēnei wā e iwa ngā kaitūao, tokowha ngā kaitūao hōu engari ko te whakahau mai te kaiwhakarite o te tari a Maera Maki he tūranga nui tō Jack ki roto i te teihana.

“Nō mātou te hōnore na te mea koia to mātou kaumatua i te wā ka tū ngā aitua koia tērā e whakahaere karakia ki runga i a mātou kia wātea mātou te hoki ki o mātou whānau.”

I whakanui hoki te koromatua o Whakatāne i a ia, “I te wā kua mahi tētahi mo te rua tekau mā rima tau pēnei i a Jack, kua rītaia whai muri i te toru tekau mā toru tau, he uaua mo te kimi kaitūao ki roto o Murupara, koia tētahi o ngā pou o tēnei whare.”

Ki te rohe o ngā roto, koinei tētahi o ngā whare tinei ahi matua na runga i tōna wāhi. Ka uru mai a Kaingaroa, Murupara, Minginui/ Te Whaiti, Ruatāhuna me Waikaremoana. Kia tae ki ngā wāhi tuawhenua to rātou tino mahi. Ki tā te āpiha kaitinei ahi ā rohe, a Hamish Smith, “he tino pou a Jack ki roto o tēnei hapori o Murupara koia tētahi o ngā kaitaraiwa tokorua kei konei mo te hari i ngā taputapu whakaora ki ngā wāhi kua aituahia, he hū nui kua mahue mai e Jack, ā, he hū uaua ki te whakakī.”

Ka riro ma tētahi o ngā tama a Jack hei pupuri i te ingoa o te whānau ki roto i tari ahi. Ko ōna wawata he whai i ngā tapuwae o tōna pāpā.