Kaupapa: Education

Ka kapi pea i te Minita Mātauranga ngā tatau o Te Kura Hourua o Whangaruru

  • Te Tai Tokerau

Ka kapi pea i te Minita Mātauranga ngā tatau o te kura hourua, i utua ai te whā ira waru miriona tāra pūtea tāke i roto i tōna whakatūhanga.

Me te aha, e rere ana te arero koi o te rōpū Reipa ki a Minita Parata, nāna rā te rōpū whakahaere i te kura o Ngā Parirau Mātauranga Trust i whakamōhio mō te whakakorenga o te kirimana mō te Kura Hourua o Whangaruru.

Kāre te kura me te Minita i wātea ki te kōrero ā-kāmera mai, engari e mōhio tonu ana a Te Kāea, mena ka kati te kura, ka ngana te Manatū ki te whiriwhiri i te whakahokinga mai o ngā pūtea me ngā rawa a te kura.  Ko te pāmu pea, e waru tekau ma tahi heketea te nui, a te tarahiti, ka riro.

I te Huitanguru i tēnei tau, tohu ai a Parata ki te kura kia whakatikatika i tōna whare, engari nō tetahi arotake i te Whiringa-a-Nuku ka kitea, e raru tonu te kounga o ngā mahi whakaako, me te marautanga.

Toru tekau ngā tauira o te kura inaianei, hēoi mena ka katia te kura, mā te Manatu te mahi hei āwhina i ngā tauira ki kura kē, i ngā whānau hoki.

Hei te tekau mā rima o Kohitātea huakina ai te tatau a te Minita kia rongo ai i ngā whakaaro a te poari mō tana hiahia kia whakakorea te kirimana mo te kura hourua hei te tuawhitu o Poutūterangi.