Kaupapa: Entertainment

Inā te maha o ngā hōtaka Māori e whakataetae ana mō Ngā Tohu NZTV

Mānia Clarke
  • Tāmaki Makaurau

Ka whakamānawa i ngā mātanga hanga kiriata pouaka whakaata ākōkō ake nei ki te pō tuku tohu o HUAWEI MATE20 o Aotearoa ki Tāmaki Makaurau. Ka mutu he maha ngā hōtaka Māori kua tohuna hei kōwhiringa toa.

Kua eke ki te pae o angitū, te whakaaturanga motuhenga o Casketeers.

“Ahakoa te taumahatanga o te mate, te rongomaiwhiti o te mate te kahinapōuri, tērā hoki te wairua harikoa, te wairua whakangahau te wairua aroha,” i kī atu a te kaihanga o Casketeers a Annabelle Lee-Mather.

Kua kōwhiria a Casketeers hei kōwhiringa toa mō te Terenga Motuhenga Motuhake Papai me te wāhnga hōtaka Māori Pai Rawa o Te Māngai Pāho.

“Waimārie mātou i a Francis, tino matatau a Francis ki ērā āhuatanga katoa,” i mea atu a Lee-Mather, “nāna mātou i arahi kia hīkoi i te ara tika, hei waihanga i tēnei hōtaka.”

Kua whakaingoatia te hōtaka kawe kōrero o te Reo Tātaki a Te Karere, Te Waka Huia - Timoti Karetu me Whaikōrero ki te wāhanga hōtaka kounga i Te Reo o Te Māngai Pāho.

“Ko rātou kei te whakakanohi i ēnei hōtaka ko rātou te hunga e tuitui ana i ngā kōrero, ko rātou anō kei te whakaū i tēnei tāonga hei mātaki, hei whakarongo mā te katoa,” te korero atu te kaiwhakahaere, ringatohu o Terenga Tuarua o Whaikōrero, a Mahanga Pihama.

Otia, ko te hōtaka take o te wā o Te Kāea mai Whakaata Māori, 1 News rātou ko Newshub ngā kōwhiringa toa mō Te Whakapāhotanga Pai Rawa i Ngā Take o Te Wā.