Kaupapa: Api Mahuika

I rongo te ao tōrangapū i tōna mana a Tākuta Apirana Mahuika

  • Te Tai Rāwhiti

Inā te mana o tōna īngoa kaore e kore, ko te ao tōrangapū i matapaetia kētia, hei huarahi mōna. Heoi ehara i te mea i noho a Tākuta Apirana Mahuika hei mema pāremata, engari i rongo tonu te ao tōrangapū i tōna mana.

He arero taiaha, he unuhanga taniwha hoki.

Ko te pene ki te pepa mō ngā kōkōraho a Ngāti Porou, i whakapau kaha a Mahuika kia riro i tana iwi tētahi whakataunga, neke ake i te kotahi rau miriona tāra te nui.

E ai ki a Marama Fox, “I roto i tō rātou kereme, koia tēnā i hoea taua waka i roto i tā rātou reo tūturu, koia tēnā e hoea i tērā o ngā waka kaore i hoea anake engari koia te kāpene me kī.”

Hei tā Hekia Parata, “He kanohi a ia, he māngai a ia, he hinengaro tōna hei akiaki hei whakahau i te kāwanatanga ahakoa te kāwanatanga o tēnei wā, ngā kāwanatanga o mua.”

Nā Apirana Ngata tonu taua īngoa i tapa ki runga i a ia, nā whai anō ngā pānga nui a Mahuika i te ao torangapū.

Ki tā Fox, “Kāre ia i te haere me tōna kotahi, engari ko rātou tērā o Ngāti Porou, Pāpā Amster, ko te kuia Rawinia. He maha ngā pou pērā te taumata e haere atu rā, engari koia tētahi o te maunga Hikurangi.”

Hei tā Parata, “Ko taku, me whakanui tātou i ōna mahi katoa a ia i runga i te mata o te whenua. He tino mihi ki a ia.”

Kua rere te reo o Mahuika ki ngā kokonga e wha o te whare nei, ā kua pupuri ia ki ngā kupu a tōna tūpuna a Tā Apirana Ngāta, arā kua mau ki ngā rakau a te Pākeha, engari kua noho tōna ngākau ki ngā taonga a ōna tūpuna.