He whare hōu mā te city mission.

Tema Hemi
  • Tāmaki Makaurau

He moni hōu, neke atu i te tekau miriona tāra hei hāpai i te kaupapa haumanu waranga a te Mihana o Tāmaki Makaurau.  He pūtea i riro mai i raro i te ture Criminal Proceeds Act, ka maha ake ngā moenga mā te hunga waranga.  

He pūtea nui hei tautoko atu i te hunga kua herea i ngā tūkinotanga o te whakapōauau me te inu waipiro.

Ko tā Te Minita Take Hauora David Clark, "E poho kererū ana te kāwanatanga ki te whakapaho atu i te putea hei utua i ngā taumata e rua o te whare hou o te city mission. He whare ruruhau mā te toru tekau ngā moenga."

He pikitanga tēra i te rima tekau paihēneti ki rō Tāmaki nei, engari ko te pātai nui kua nawhe tēra?

Ko tā Clark anō, "Kei runga noa atu ngā mātanga hauora nei. He wewehitanga nui to rātou, he mātanga i whakangūngū ai i ngā akoranga pōauau inu waipiro hoki, mate hinengaro, te ao Māori, tiaki kaumātua, tukinotanga hoki."

He putea i whakaora mai i ngā mahi tinihanga a te hunga nanakia.

Anei ko tā Clark mo tēnei putea me te whare hōu, "Anō te pai te kite i tēnei putea kua whakatōngia ki roto i tētahi kaupapa pai. He wāhi taunga mā ngā manuhiri, he wāhi ki waho atu, he whare pakari tinana. Ka hanga mai ētahi whare ma te hunga tūroro. He ahurea e kaha manāki i te hunga whai oranga."

Ko tā Pirimia Ardern kōrero ka kaha tautoko ia i te city mission.

Ko tāna anō, "Ka toko ake to whakāro ki ahau, ā ehara noa iho tēnei wāhi he wāhi whakautua i ngā porarurarutanga ki roto o Tāmaki anake. Ka whaia e rātou i te huarahi tika kia mauria mai i ngā kaimahi tika kei a rātou ngā whakautu tika hei ārai atu i ngā kaupēhitanga ka kitea i a te rā."

Ko te tikanga ka oti te hanga whare nei hei te tau rua mano tekau mā rua.