Kaupapa: Education

He tauira rūmaki ka tū ki te whakataetae Pūreta o Aotearoa

Te Kuru o te Marama Dewes
  • Tāmaki Makaurau

He tauira rūmaki a Isabella Ashby (Ngāti Whātua o Kaipara) ka tū ki te whakataetae Pūreta o Aotearoa hei ngā rangi e heke mai nei. Neke atu i te kotahi rau ngā kura o te motu i tū ki ngā whakataetae ā rohe, me te aha, kua puta tōna iho kia uru atu ki ngā whiringa toa.

"Ka hihiri ahau ki te whakamahi i ērā kupu nā te mea ko ētahi kare-ā-roto, ētahi āhuatanga, tē tāea te kōrero mō ērā āhuatanga hei kupu mēnā kāre koe i te mōhio i ngā kupu hou nei."

14 ōna tau, ngākaunui ana a Isabella Ashby ki te pānui pukapuka, ka mutu, mā te whakataetae ka whanake tōna reo.

"Mēnā ka mahi koe i tētahi whakamātautau, kei te mōhio koe he aha tō taumata ki tāu anō, engari mā te whakataetae atu ki ētahi atu tāngata ka mōhio koe pēhea tō taumata ā ao nei."

He tauira tau 10 a Isabella ki Ngā Puna o Waiorea, hei tā Isabella Ashby, mā te reo Māori e whāngai i te wairua ako.

"Mā te mōhio ki te reo Māori ka ako koe me pēhea te whakahua kupu ā oro engari ka ako hoki koe ki te aroha ki ngā reo katoa ki ngā iwi katoa."

Hei tāna mā tētahi whakataetae wetereo Māori e hīkaka ake ai te rangatahi ki tōna reo.

"Hei whakataetae mō te whakamāramatanga o te kupu, nō reira me whakataetae mātau ki te mōhio nō hea ngā kupu, i pēhea te kupu i whānau mai."

Hei te Rāhoroi tū ai te whakataetae Pūreta ā motu ki Te Whanga Nui a Tara.