Ngā kaupapa: Education, Entertainment

He poroporoāki nui ki a Te Rurehe Rangihau

  • Waikato/Te Waiariki

Nuku atu i te rima rau tāngata i whakarauika ake ki runga o Ngahina Marae, ki Ruatoki ki te tuku poroporoāki ki tētahi mātanga kaiako, puoro, waiata hoki. I mate a Te Rurehe John Rangihau i te pō o te Rāmere ka huri i muri i tōna taenga atu ki te hōhipera o Rotorua. 

Koia ko te murau a te tini, ā, i taetae mai te mano kia mihia, kia tangihia ai a Te Rurehe John Rangihau, e mōhiotia whānuitia nei ko 'Boy'.

Hei tā Te Makarīni Temara, “He kotuku na rerenga tahi, kua mahue mai nei tātau, ko tātau nei kua mokemoke mōna.”

He kaiakiaki a Te Rurehe i te reo Māori mō ngā tau maha i noho ia hei kaiako ki Te Ataarangi, ki Te Whare Wānanga o Awanuiarangi me ētahi kura tini maha.

E ai ki a Ihaka Nopera, “Ko Te Rurehe, koia te ringa matau o Te Heikōkō Katerina Mataira mō ngā rūruhi o Te Ataarangi.”

Nō Te Arawa, Ngāti Whakaue me Tūhoe a Te Rurehe, he kaitito waiata, kaiwhakangahau hoki i kaha whakaaturia ai āna mahi ki ngā huihuinga māori pēnei i te Hui Ahurei a Tūhoe.

Ko Te Makarīni Temara tēra e mea ana, “Ko te hekenga tēnei a Te Rangiāniwaniwa rāua ko Wena, na pou tērā o te ahurei a Ngāi Tūhoe, taka iho mai a Te Rurehe, koia tonu te kaitakawaenga i ngā kōrero mō tana ahurei i roto i ēnei tau.” 

Ka ora tonu ana mahi ki roto i ngā ringaringa o āna ākonga, ki roto hoki i ngā waiata maha kua titoa e ia.