Kaupapa: Entertainment

He kupu whakatūpato mō te hunga haere ki tāwāhi hei te wā o ngā hararei

Mānia Clarke
  • Tāmaki Makaurau

He kōrero whakatūpato mai tētehi whānau tokowhā ki te hunga haere ki tāwāhi ki te whakatikatika i ngā whakarite haerenga hei te wā o ngā hararei.

Kua hōhā te tokowhā i te whakatārewatanga o ā rātou haerenga i ngā rā whakatā nei, nā te hapa o tētahi kamupene whakahaere wakarererangi.

E ai ki tētehi o te tokowhā, e ai ki a Shelley Bedggood, “He kōrero tūpato ki ngā whānau e whakarite harerei ana kia āta titiro ki ō tīketi, kia āta pānui ngā kupu iti, tērā pea waea atu ki ngā tāngata, kia tino whakarite.”

E whia marama ki muri i utua kē ai te tokowhā rā i ā rātou tīketi ki Bali mā te kamupene whakarite waka rererangi o STA Travel, wheoi i tā rātou taenga atu ki te papa waka rererangi o Tāmaki Makaurau ki te eke i tā rātou rererangi i te whitu karaka i te ata i hīkina ngā whakaritenga.

“I tae atu mātou ki te waka rererangi e whā karakia i te ata,” i mea atu a Bedggod, “ā, i rite ā mātou pēke, ō mātou taputapu katoa, heoi anō i te wā mātou ki tērā ki te kōrero ki te tangata kia homai ngā tīketi, kāore i tika, kāore i whakarite, i whakamana te kaiwhakahaere o STA i tō mātou haere ki tāwāhi ki Bali.” 

Nā wai i hē kātahi ka tino hē kē atu, e rima rau e ono tekau tāra i utua kētia e rātou mō tō rātou nohonga me ngā ngahau e kore rawa e whakahokia.

“Ehara nō mātou te hē. I rite katoa tō mātou taha, i haere hoki ahau ki te kōrero ki a rātou tahi marama i mua kia kite mehemea kua tika ō mātou tīketi.”

I tono atu mātou o Te Kāea ki te tari o STA i Manukau nei ki te whakautu, engari kāore te kaiwhakahaere e waatea ana ki te kōrero.

Wheoi, kua whakatikaina e STA ō rātou hara me te utu i ngā rerenga hōu.

“Ko tō mātou hiahia kia rere atu kia tau ki Bali i tēnei rā tonu, heoi anō ko te whakatau ka haere āpōpō.”

He whakamaharatanga anō kia āta tirotiro ngā whakarite haerenga ki rāwāhi hei mua i te tīmatatanga o te wā rorirori.