Kaupapa: Kapa Haka

He koha nui kua takohatia atu e Te Rōpū Tiaki o Te Arawa Kapa Haka ki a Donna Grant

  • Waikato/Te Waiariki

He tekau mano tāra kua tāpaetia e te Rōpū Tiaki o Te Arawa Kapa Haka hei tautoko i a Donna Grant. 

E rere ana ngā whakatewhatewha a Te Tari Hara Tāware ki runga i Te Whare Wānanga o Awanuiarangi whai muri i te kitehanga.

He ono miriona tāra i tua atu i te whakataunga tika, i utua ki te tohu tāpoi i raro i ngā whakahaere a Donna Grant, kua heke i tōna tūnga. 

Ko Donna Grant tēnei ki ngā whakataetae ā rohe o Te Arawa i a ia e tū ana mō tōna kapa, Ngā Uri o Te Whanoa.

I ngā tau ki muri kua whakapau kaha ia ki te hiki i ngā mahi haka ā motu, ki te ao hoki.

Mo te rōpū tiaki o Te Arawa Kapa Haka ko tā rātou he whakahaere i ngā whakataetae ā rohe, he māngai hoki mo te rohe ki Te Matatini.

Ki te hui a te rōpū kaitiaki Te Arawa Kapa Haka, ko ngā mēmā ko ngā māngai mai i ngā rōpū haka o Te Arawa waka, i whakaaetia te tāpaetanga o tētahi koha, tekau māno tārā ki a Donna me tōna whānau. 

Ko tōna hoa rangatira, a Anaru Grant te heamana o te rōpū tiaki o Te Arawa Kapa Haka, ko Rangitihi Pene te māngai mo Te Arawa ki Te Matatini hei tāna i whakawātea ake a Anaru mai i te hui kia kōrero, kia whakatau i te take e pā ana ki te pūtea nei me tōna whānau.

Hei tā Te Ururoa Flavell, “Ko ngā mahi a tērā o ngā rōpū kei a rātou te tikanga koira te ahuatanga o tērā momo rōpū te poari rānei, ka taka ki roto i o rātou ringaringa te kupu whakamutunga mo ngā moni, ka tīkina mai ai, ka whakapau mai ai.”

I whakapā mātou ki a Donna kāre anō ia kia whakahoki mai i wā mātou tono, kua noho wahangū ia ki ngā whaktewhatewha ki runga i a ia.  Ki tā te Minita whanake Māori kāre he hē i roto i ngā mahi a te rōpū kaitiaki Te Arawa kapa haka.

E ai ki a Te Ururoa Flavell, “Te Mana kei tērā o ngā momo poari, na rātou anō  e whiriwhiri i tērā huarahi, ka mutu, ka whakamātauria e ngā mea kei roto i tērā poari hoki mo ngā moni ka whakapauhia, otira mo ngā moni ka tīkina mai nō wāhi kē.”

E mōhio ana tatau he tekau māno tāra te pūtea i tāpaetia ki a Donna Grant me tōna whanau hei tautoko i a rātou.  Kāre ano kia whakatauhia mēna kua whakaae te whānau ki te pūtea kua takoto.