E whakanui ana te tāone o Whanganui i to rātou piriti

Tema Hemi
  • Te Tai Hauāuru

E whakanui ana te tāone o Whanganui i te kotahi rau rima tekau tau o te piriti matua kei te pokapu o te tāone. Ko te awa tipua tonu te iho matua o te takiwa engari ko te piriti e whakakotahi ana i te tāone katoa. 

No mua i te whakatuwheratanga o te piriti i te Whiringa ā rangi i tērā atu rau tau, ko te awa tonu te huarahi matua. Tata ki te tekau ma toru mano pāuna te utu me te tekau ma wha ngā tau hoki ki te hanga i te piriti nei. He uaua ma te hunga hāerēre te whakawhiti i te awa, rātou mai i Pōneke e haere ana i te ākau o te uru. I kō atu i te toru tekau ngā tau ki te hanga tika i te piriti. Ka tū he hui whakanui i te kotahi rau rima tekau tau o te piriti matua nei i tēnei tau ā kaore ano te kaunihera kia whakatau ahea taua hui ka tū. 
 

Ko tā tētahi o ngā kaikōrero o Te Awa Tipua o Whanganui a Rauru Broughton, "Ko te awa tipua o Whanganui ara te awa e rere nei, koira te mauri ora mai i tōna oroko timatanga tae noa mai ki tēnei wa, te mauri ora o te iwi o Whanganui. Koia tonu hoki te wāhi te pātaka kai i mua i hanganga mai o ngā piriti o ngā arahanga nei. Kei te ngana kaha ki te mau ki ngā tikanga, ki ngā paiaka, ki ngā kawa ora ōmua i roto i ēnei rā tonu nei."

Ko tā Brent Holmes o Te Kaunihera o Whanganui, "Mā te piriti ka taea ngā taputapu taumaha me te hunga taraiwa motoka te whakawhiti i te awa, ka taea hoki ngā iwi o te tāone te haere atu ki ngā wāhi katoa o te tāone. Ka taea hoki te kawe a mātou rauemi, ngā taputapu katoa e pā ana ki ngā rātonga e āwhina nei i te hapori. Ka hanga mātou ētahi pou whakahaumaru ki runga i te piriti hei ngā tau kei te eke mai, ka hanga ētahi atu ara hikoi, ara pahikara hoki hei painga ma te hapori. Ko te awa tonu te putake o tēnei tāone, o tēnei hapori hoki, e kotahi tātou o Whanganui nui tonu."