Kaupapa: Rugby

E whakaheke tōhau ana ngā Raiona o Pōneke mō te whiringa toa o te Ipu ITM

  • Te Whanganui-ā-Tara

E whakaheke tōhau ana te kapa Raiona o Pōneke mō te wero nui e kainamu mai nei, i te tākaro whiringa toa o te tauwhāinga Ipu ITM ki te taiwhanga o Westpac āpōpō.

Ka mutu, haunga rā te whai mana nui a Waitaha, e ai ki te Raiona Māori nei, a Tim Bateman, ka pakanga ururoa tonu tana kapa, tae atu ki te mutunga.

Me whakarite mahere tākaro kia hāngai atu ai ki te matapae huarere, he ua marangai, he hau pupuhi te āhua āpōpō.

Eaoia, he tekau mā toru tau ki muri nei te wā whakamutunga i eke panuku te kapa Lions.

Āpiti atu, ko Waitaha ngā toa e whai atu ana i tā rātou toahanga tuaono.  

I ngā tau tekau nei, e waru ngā wā i whai wāhi atu ai te kapa Lions ki ngā whiringa whāiti, nō te tau rua mano mā iwa i puta rātou ki te whiringa toa, ā, i tūrakitia rātou e Waitaha.

I ngā tau rua mano mā waru me te rua mano mā iwa i tākaro a Bateman mō te kapa Waitaha, i toa ai i te tauwhainga matua o te motu i mua i tana wehe atu ki Hapanī tākaro ai mā te karapu West Red Sparks.