Kaupapa: Housing

E ngana ana tētehi iwi ki te tonga o Tāmaki kia whai reo ai mō ngā whare hōu e 10, 000

Mānia Clarke
  • Tāmaki Makaurau
  • Waikato/Te Waiariki

Ko Te Ākitai o Waiōhua, i te tonga o Tāmaki Makaurau kei te hiahia whai wāhi atu ai ki te tēpu kōrero i te putanga o te kaupapa a te kāwanatanga ki te whakatū kia tekau mano ngā whare hōu ki Ngā Hau Māngere.

He hautoru o ēnā whare ka hokona i raro i te kaupapa Kiwi Build, he hautoru hoki ka noho hei whare kāwanatanga.

E ngana ana te iwi kāinga kia whai wāhi ki te whanaketanga hōu hei turaki i ngā whare karukaru e rua mano e whitu rau, ki te whakatū i ngā kāinga hōu tekau mano te nui.

“Koina te tīmatatanga noaiho nei atu nei kia noho tahi ai ki runga i te tēpū, whakaarohia ai me ngā kōrero whakawhitiwhiti hoki, me pēwhea rā e mahi tahi i te taha o te iwi nei,” i mea atu te māngai a David Wilson-Takaanini.

“Nā te iwi e mōhio nei ki ngā hītori, ki ngā tumu whakarae katoa o te rohe nei.”

Ka hangaia ngā whare e toru mano e rima rau o KiwiBuild me ngā whare māmā te utu, e toru mano ngā whare karauna, ā e toru mano e rima rau ngā whare mākete.

“We're also looking at specific ways we can work with Iwi and other Māori organisations to make sure that whānau Māori get a fair shot at the KiwiBuild homes,” i kī atu te Minita Manatū Whare Tāone a Phil Twyford.

E whakarite ana te kamupene o HLC i raro i te maru o Te Kaporeihana o Aotearoa i ngā mahi hanganga i roto i ngā tau tekau ma rima e heke mai nei.

“We're very keen to make sure that the homes here built in Māngere are available first to those that live in Māngere or work in Māngere, or are manawhenua or iwi links,” i kōrero atu te kaiwhakahaere o HCL a Mark Fraser.

Kua tīmata kē te whakatikatika i a papatūānuku i Māngere nei mō ngā whare tuatahi.

E ono tekau mā ono ngā whare karauna ka tū ki tēnei taha o Cessna Place, tōna kotahi rau ngā whare mākete me ngā whare māmā te utu ki tērā atu taha o te rori.

Ka tīmata te hanga i ngā whare koporeihana ā tērā marama, ka tūwhera ki ngā whānau ki waenga i te tau hōu, me ngā whare o KiwiBuild, māmā te utu hoki hei te paunga o te tau rua mano tekau mā iwa.