Kaupapa: Education

E māharahara ana tētehi tumaki Wharekura i te arotakenga mātauranga hōu

Mānia Clarke
  • Tāmaki Makaurau

Kāore tonu ā tātou tauira Māori e kuraina ana i roto i ngā kura auraki e whai hua i te arotakenga hōu mō Ngā Kura Āpōpō. Koira te whakapae a tētahi tumuaki o tētahi wharekura ki te tonga o Tāmaki.

Kāore te ūpoko o Te Wharekura o Manurewa a Maahia Nathan i te paku rata ki te arotakenga mātauranga hōu.

“Ko te tino pūnaha mātauranga Pākehā tērā kei reira tonu. Korekau anō kia rerekē,” i mea atu ia, “heoi anō ko te raweke noaiho tātou i ngā pihi i runga i te papatākaro mea rawa ake ko taua pikitia rā anō.”

He whakaiti i te mana o ngā poari ā kura, he whakatū i ngā rōpū mātauranga a te karauna, ki te whakahaere i ngā whakaritenga o ngā kura kotahi rau e rua tekau mā rima neke atu, ngētehi o ngā tohutohu.

“Kāhore wā tātou tamariki i te eke ki ngā taumata e tika ana i roto i tēnei pūnaha kei a tātou i tēnei wā.”

“Kua oti kē ā tātou te hakatū te kōhanga reo, te kura kaupapa, whare kura, whare wānanga, kaua he mea e tua atu i tērā. Kua kite tātou i ngā hua e puta ana i roto i wēnei momo kaupapa.”

Kua waru marama te tira motuhake e arotake ana i ngā tūkanga poari whakahaere kura i ngā tau e toru tekau kua hipa, inā te maha o ngā nawe me ngā tamariki e noho pōkaikaha.

Ko tā Nathan me rahi ake te pūtea a te kāwanatanga ki ngā kura kaupapa Māori.

“He kaupapa tēnei i raro i te Tiriti nē, kia ōrite ai ki te iwi Māori me ōrite anō ko te kaupapa ko te putea whāngai nei e rātou ki ngā kura Pākehā ki ngā kura Māori.”

E akiaki ana a Nathan i ngā kaitiaki ki te tuku ā rātou tamariki ki ngā kura kaupapa Māori kia eke ai rātou ki te pae o angitu.