Kaupapa: Tainui

E kōkiri ana a King Tuheitia ki te whakakotahi i ngōna iwi i te Poukai ka tū ki te marae o Horahora.

Mānia Clarke
  • Waikato/Te Waiariki

Kua whakatōpū a Kiingi Tuheitia Potatau Te Wherowhero VII rātou ko ngā kaitiaki o Te Kiingitanga ki te huinga ā-tau tua waru tekau mā rima te Poukai e tū nei ki te marae o Horahora i te rangi tuatahi o te tau hōu Pākehā.

Hei tā te Toki a Kiingi Tuheitia, hei tā Brad Totorewa, e hīkoi ngātahi ana ki te pao o te taramu kotahi me te whakaū tonu ki ngā mātāpono o Te Kiingitanga.

“Me kī ko ngā kaupapa matua ka kōkiritia e tō tātou Kiingi, ko te kotahitanga. Kotahitangi o tōna iwi, te tuatahi kei te māmāmua o tana whakaaro,” i mea atu a Totorewa.

“Whakakotahi i ōna marae, i ōna hapū, i ōna kaiārahi, i ōna kaiwhakahaere, i ōna  tarati, tōna Kauhanganui rānō.”

Ā, he whakamahara i a rātou kua whetūrangitia i te tau kua hori.

 “Ngā poukai i whakatūhia i konei mō te pouwaru, te pani me te rawakore tērā te kaupapa,” i kī atu a kaumātua a Pat Kiingi o Ngāti Naho, Ngāti Pou.

“Tērā te kaupapa i tēnei rā kei konei mātou ki te tautoko.”

Horahora pātaka, horahora kai, nō te tau toru tekau mā toru i tū ai Te Puna kai tuatahi i konei, i te whakawhitinga rā me tētehi o ngā marae o Te Puaha o Waikato, arā, ko Tauranganui.

“Ko ngā tino kai i tēnei takiwā i tēnei o ngā Poukai ko ngā tuna, ko te kānga wai me ērā atu o ngā kai tawhito,” te kupu a tētehi o te haukāinga a Herewini Moana.

“I ēnei rā tonu kei te hiahia, kei te ngana tātou te kimi i āua kai whēnei i te kēwai.”

Ka whakanuia e te marae tōna huritau e waru tekau mā rima ā, i tae ā-tīnana atu te tino ngerongero nō Tainui waka, nō ngā mātāwaka  anō hoki ki te whakamānawa i te karanga o te rā.

“Me hoki rā tātou ki te āhuatanga o ō tātou tūpuna, ō tātou koroua, ō tātou kuia,” i korero atu a kaumātua nō Ngāti Pikiao a Muriwai Ihākara.

“Kotahi te maringa mai o te waha, ā, koia!”

“Kua ora te marae, kua tū ngā whare nei, hei aha?” i mea atu a Kingi, “mō te Kiingitanga, mō te iwi.”

Ka whakatōpū atu anō ngā pononga o te Kiingitanga ki Te Teko mō te Poukai ka tū ki te marae o Kokohinau.