Ngā kaupapa: Kapa Haka, Te Matatini

E ahu atu ana te reanga mokopuna tuarua a Te Rōpū Manutaki ki Te Matatini - Pūrongo Motuhake

  • Tāmaki Makaurau

E ahu atu ana a Te Rōpū Manutaki, he toa ā-motu o mua, ki tōnā reanga mokopuna tuarua te tū ki runga papa whakataetae tae mai Te Matatini ki Ōtautahi. Ā, I te hekenga mai a Tākuta Pita Sharples i tōnā tūranga kaiārahi me te mea nei ko tōnā Tama kei te ārahi i tōna kaupapa whā tekau mā whitu tau te pakeke.

I kōrero a Heeni Brown ki te kaiako hōu o te rōpū nei, a Te Hira Paenga.

“Ko Te Hira Paenga tōku īngoa; nō Ngāti Porou tōku pāpā, nō Ngāpuhi, Te Tai Tokerau tōku māmā. Ko ahau tētahi o ngā kaiako o Te Rōpū Manutaki.

Kotahi tau ki muri, i te whakaaro ake tō mātou pāpā a Pāpā Pita, tuatahi mō āna mahi me tāna heke mai i tēnei tūranga mahi hei minita Māori mō te Rōpū Tōrangapu Māori; ka rua, ko tā mātou tuakana a Paora i a ia te mahi nui ki te pīkau i te kaupapa whakaari, he kaupapa ā-motu i puea ake i roto o Haina. Nāreira i whai whakaaro ki a au me āku mahi mō te roanga ake o taua tau.  Nōreira ahau i ngana ki te whai i tēnei tūranga hei kaiako.

Heoi anō kua whā tekau mā whitu tau mātou e mahi ana i ā mātou mahi, ā, kua whai tamariki ngā tamariki i noho tuatahi i roto i te kapa, nāreira kua eke nei mātou ki te reanga tuawhā, ka huri te ao, ka huri te reo, ka huri haere te āhua o ngā mahi.  

Ka noho ahau ka māharahara, kua tae ki te wā pea e aro ai mātou te iwi Māori e noho taone ki te whakapūmau i tō tātou whare, i tō tātou marae, te whakapūmau rānei i ngā matawaka, i ngā mātāpono i ngā kōrero ā-iwi kei roto mai i tēnā me tēna.  Nōreira i a Pāpā Pita tōna āhua ake, i a Paora tōna āhua ake, ka whai mai au me te whakatō i te ngākau hihiri ki tētahi reanga kāore i tino mōhio ki ngā mahi a Te Rōpū Manutaki. 

Ko te wero nui ko te whakawhirinaki mai o te reanga o ōku mātua. I mau pūmau i a rātou ngā panekoti, i mau pūmau i a rātou te āhua kawe i te poi. I mau pūmau i a rātou te kawe i te rākau. Ka rawe tērā, ka pai tērā. Mō te hunga rangatahi e hao ake nei, me kī, nō mātou pea te hē, whāngaihia rātou ki ngā kai pai, ki ngā kai reka. Ko te mea nui ko te āta ketuketu i a rātou kia ngākau whakaiti, kia ngākau hūmārie, kia maumahara rātou i tīmata tō rātou ao kapa, kei te kōrero au mō ngā tamariki o Hoani Waititi nei, i tīmata tō rātou ao haka i Te Rōpū Manutaki.

Ka ora te Kapa Manutaki i roto i ā tātou mahi, kia kōrero au mō ngā torotoronga o te kōhanga, o te kura tuatahi, o te wharekura, te whare tū tauā, ngā mahi whakahaere i runga marae, ka ora i roto i a rātou.  Takatū mai ana te hunga manuhiri ko te reo ōkawa nō Te Rōpū Manutaki, takatū mai ana he tūpāpaku ko te reo mihi ko Te Rōpū Manutaki. Nāreira kite ana au he Rōpū Manutaki ki runga marae ātea, he Rōpū Manutaki anō kei runga i te papa whakatūwaewae Matatini.”