Ngā kaupapa: Housing, Tainui

$5.8miriona hōu mō ngā kaupapa hanga whare ā-hapori

updated Mānia Clarke
  • Waikato/Te Waiariki

Kua puta te whakatau a te Minita Whanaketanga Māori a Nanaia Mahuta, e rima ira waru miriona tāra te putea hōu kua tohu mō ngā kaupapa hanga whare ā te hapori, e rua tekau mā whā. 

Nā Mahuta te hui Whare Māori ā-motu ia rua tau tua whā i Ngāruawāhia i whakatūwhera.

E tutuki ana te tongi a Kiingi Tawhiao, "Maaku anoo e hanga tooku nei whare" mō te whānau Turner kua hanga kē tō rātou papakāinga e waru ngōna rūma moe.

E koa ana a Hone Balm-Turner i te rima ira waru miriona tāra ka tuku ki te āwhina i ngētahi atu whānau.

“Ki au nei tino pai rawa atu, ehara mō māua nei//engari hoki te mea nui kia tuku atu rā ki ngā whānau e kimi haere nei he papakāinga mō rātou,” i kī atu a Balm-Turner.

Kei kora te iwi o Ngāti Tahu Ngāti Whaoa ki te ako me pēwhea te hanga whare hōu mō ō rātou uri.

“Kei te rongo mātou ki tō tātou nei Minita a Nanaia Mahuta e whakapāho atu ki tēnā kaupapa i te tuku pūtea i waenganui i Te Puni Kōkiri. Koinei tō mātou nei hiahia me pēhea te putea, engari me pēhea te whakatū whare,” i mea atu a Iwi Te Whau nō Ngāti Tahu Ngāti Whaoa.

Ko ngētehi o ngā rōpū hanga whare ā-hapori ara ko Korimiti Consultancy tōna iwa rau ono tekau māno tāra mō ngā kāinga e rua tekau mā tahi ki te tonga o Waitaha, e toru rau rima tekau mano ki a Ngātiwai Trust, e toru rau mano tāra ki Te Hauora o Tūranganui-ā-Kiwa.

Ka kauwhau atu te Minita take Whare a Phil Twyford me te Minita o Whānau Ora a Peeni Henare ki te rā tuarua o te huinga āpōpō.

Ko te whakapae hei reira whakaputa kōrero ai a Twyford mō tētehi Ohu Mahi a te Kāwanatanga mō ngā whare Māori.