Kua rewa te waiata reo Māori tuatahi a Seth Haapu

Leah Te Whata

Kua whakarewahia e Seth Haapu tāna waiata reo Māori tuatahi. Nā te mātanga reo Māori, nā Mataia Keepa te waiata 'Ngaru Hou' i whakamāori, ā, ko tāna, ka whai wāhi ai ngā waiata māori pēnei ki te whakarauora i te reo.

Ko tā Haapu ki a Te Kāea, "I've fallen in love with being Māori, with being proud of our culture and our language."

Kua rewa ake tāna waiata Māori tuatahi, ko Ngaru Hou te ingoa. He hua o te ruku i tōna tuakiritanga.

"I only hope that when people hear it and they hear out language and this song that they can feel that too, they can feel empowered by knowing about who they are."

He tuāpapa tō ngā kaiwaiata Māori ki te whakatairanga i te reo. Nā Mataia Keepa ngā kupu Māori, ko tāna, e whai wāhi nui ana ngā waiata i te ao o te whakarauora i te reo.

E ai ki a Keepa, "Mehemea tātou ka hoki ake ki ngā mōteatea o nehe, he nui te hokihoki a te iwi māori ki ērā kia tīkina mai ai ko ētahi kupu, ko ētahi kīanga, ko ētahi whakatauki. Ko tēnei waiata nei ko te naianei e ai ki tērā whakarauoratanga."

Otirā ia, ko te reo o roto i ngā waiata ka kawea ake e te taringa pīkari.

"Ko te akiaki nui kia pātata atu ētahi kaiwaiata ki ētahi tohunga, mātanga tito, nā te mea he wā tōna, ka akona a rātou kīanga. Ki te hē ētahi o ngā kīanga, ka akona hētia, ka kōrerotia hētia."

E hiahia ana a Haapu ki te whakatītina i ngā tāngata e noho whakamā ana i te ao Māori kia maia, kia hautoa.

Ko tā Haapu, "On a deeper level I hope that people who are a bit whakamā to learn or to speak or to sing, both Māori and non-Māori, that they would fing the confidence in themselves to know that it's all good."

Ahakoa ko tēnei tāna waiata Māori tuatahi, ko tā Haapu, ehara tēnei i te whakamutunga.